សុខ រ៉ាស៊ី បំផុសរួមគ្នាផ្សព្វផ្សាយទេសចរណ៍ដើម្បីកំណើនសេដ្ឋកិច្ចនិងប្រជាជនកម្ពុជា

ដើម្បីរួមចំណែកក៏ដូចជាចូលរួមផ្សព្វផ្សាយនូវទេសចរណ៍កម្ពុជា ពិធីករដ៏មានប្រជាប្រិយភាពលោក សុខ រ៉ាស៊ី បានចេញមុខបំផុសដោយអំពាវនាវឱ្យប្រជាពលរដ្ឋ និងមហាជនរួមគ្នាលើកស្ទួយ តាមរយ:ការផ្សព្វផ្សាយអំពីទេសចរណ៍ទៅកាន់ពិភពលោក។

ជាការកត់សម្គាល់ពិធីករលោក សុខ រ៉ាស៊ី កន្លងមកគេតែងឃើញលោកបានចេញសាដាស់តឿនមហាជនអ្នកគាំទ្រអំពីបញ្ហសង្គមនានា ដើម្បីជាផលប្រយោជន៍សម្រាប់គ្រប់គ្នា។ មិនខុសពីមុនៗនោះទេ លោក សុខ រ៉ាស៊ី ពេលនេះក៏បានចេញសារដ៏មានអត្ថន័យពាក់ព័ន្ធការចូលរួមផ្សព្វផ្សាយទេសចរណ៍ដើម្បីកំណើនសេដ្ឋកិច្ចកម្ពុជា។

ពិធីករសម្បូរវោហាស័ព្ទលោក សុខ រ៉ាស៊ី បានលើកឡើងថា បើយើងគ្រប់គ្នាជួយផុសផ្សព្វផ្សាយអំពីទេសចរណ៍ប្រទេសយើង គឺជាការជួយសេដ្ឋកិច្ចប្រជាជនយើង (រួមគ្នាដើម្បីកម្ពុជា) ។ ជាការពិត នេះអាចចាត់ទុកបានថាជាសារមួយដែលមានន័យ ដើម្បីក្រើនរំលឹកផងដែរ ដល់មហាជនពិសេសគឺយុវវ័យដែលជាទំពាំងស្នងឫស្សីតែម្តង។

តាមរយ:ខ្លឹមសារបំផុសរបស់ពិធីករលោក សុខ រ៉ាស៊ី ខាងលើនេះ ពិតទទួលបានការគាំទ្រពីសំណាក់មហាជនអ្នកលេងបណ្តាញសង្គមហ្វេសប៊ុកជាច្រើន ខណ:កន្លងមកគេសង្កេតឃើញមានតារាប្រុសស្រីរបស់ខ្មែរមួយចំនួនក៏បានចេញមកបំផុស និង អំពាវនាវដល់ប្រជាពលរដ្ឋព្រមទាំងមហាជន រួមគ្នាផ្សព្វផ្សាយអំពីទេសចរណ៍ព្រមទាំងវប្បធម៌ដើម្បីកំណើនសេដ្ឋកិច្ចនឹងប្រជាជនកម្ពុជាផងដែរ៕ អត្ថបទ៖ ចាន់រ៉ា