សុខ រ៉ាស៊ី ចាត់ទុកទង្វើ Miss Grand ឥណ្ឌា មានចរិតដៀមដាមមកលើកម្ពុជា និងអាក្រក់បំផុត (មានវីដេអូ)

ពិធីករល្បីឈ្មោះលោក សុខ រ៉ាស៊ី បានសម្តែងការហួសចិត្តខ្លាំង និងរិះគន់ចំពោះទង្វើរបស់ Miss Grand ឥណ្ឌា ដែលទើបឈ្នះមកុដ MGI 2024 កាលពីថ្មីៗ បន្ទាប់ពី Miss Grand រូបនេះ និយាយដៀមដាមពាក់ព័ន្ធរឿងសណ្តែកដីកំឡុងពេលមកកម្ពុជា។

ប្រតិកម្មរបស់លោក សុខ រ៉ាស៊ី បន្ទាប់ពីមានការចែករំលែកវីដេអូខ្លីមួយ នៅលើបណ្តាញសង្គមបង្ហាញ ពីសកម្មភាពរបស់ម្ចាស់មកុដថ្មី MGI 2024 មកពីប្រទេសឥណ្ឌានោះ កំពុងអង្គុយហូបសណ្តែកដីដោយនិយាយឆ្លើយឆ្លងជាមួយនារីថៃម្នាក់ ពាក់ព័ន្ធរឿងសណ្ដែកដី ដោយមានចេតនាដៀមដាមមកលើកម្ពុជា។

តាមរយ:ទង្វើរបស់នាង Rachel ដែលជា Miss Grand ឥណ្ឌា នេះ ត្រូវបានពិធីករលោក សុខ រ៉ាស៊ី ចាត់ទុកថានាងបាននឹងកំពុងតែមានចេតនាមើលងាយមកលើប្រជាជន និងអ្នកគាំទ្រនៅកម្ពុជា។ លោកសុខរ៉ាស៊ីបានលើកឡើងថា “Miss Grand India ធ្វើជ្រុលពេកហើយមកលើកម្ពុជា ហើយលោកហាក់ស្តាយចិត្តដែលគោរពស្រលាញ់នាង។

លោក សុខ រ៉ាស៊ី បានបញ្ជាក់ថា ក្រោយឃើញវីដេអូនោះ លោកត្រូវតែបង្ខំចិត្តនិយាយព្រោះហួសចិត្តខ្លាំងពេក ចំពោះទង្វើនិងចរិតរបស់ Miss Grand ឥណ្ឌា រូបនេះ។ លោកបន្តថាមុនពេល Miss Grand ឥណ្ឌារូបនេះឈ្នះមកុដ នាងពិតជាមានចរិតទន់ភ្លន់គួរឲ្យគោរពស្រលាញ់មែនទែន ប៉ុន្តែក្រោយក្លាយជាមកុដនាងប្រែក្លាយចរិតទៅជាមនុស្សដែលអំនួតខ្លាំង។

ពិធីករលោក សុខ រ៉ាស៊ី ក៏បានបង្ហាញវីដេអូខ្លីចំនួន២ ឃ្លីបនូវសកម្មភាពរបស់ម្ចាស់មកុដថ្មី MGI 2024 មកពីប្រទេសឥណ្ឌាផងដែរ ពាក់ព័ន្ធរឿងសណ្តែកដី និងមួយទៀតពាក់ព័ន្ធការ Live លក់ប្រហុក ផ្អក និងផលិតផលផ្សេងៗតាមការបង្គាប់របស់លោក ណាវ៉ាត់ ផ្ទុយពី Miss Grand មីយ៉ាន់ម៉ា ។

សុខ រ៉ាស៊ី បានបន្ថែមថាទង្វើដែលMiss Grand ឥណ្ឌានិយាយដៀមដាមមកលើប្រទេសកម្ពុជានេះ បញ្ជាក់ឲ្យឃើញពីចរិតដ៏អាក្រក់ខ្លាំងបំផុត និងមិនមានសេចក្តីថ្លៃថ្នូរទាល់តែសោះ ព្រោះគាត់ជា Miss Grand តំណាងឲ្យប្រទេសឥណ្ឌាហើយបើសិនគាត់មានចរិតអន់មិនថ្លៃថ្នូរបែបនេះ ជឿងជាក់អ្នកគាំទ្រ ក៏មើលឃើញចរិតអន់នេះដូចគ្នា។

សូមបញ្ជាក់ថា ថ្មីៗនេះលើបណ្តាញសង្គមហ្វេសប៊ុក និង Tik Tok មានការចែករំលែកបង្កការចាប់អារម្មណ៍
ដោយផ្ទុះការរិះគន់និងវែកញែកជាថ្មី ក្រោយបានឃើញវីដេអូខ្លីមួយនៃសកម្មភាពរបស់ម្ចាស់មកុដថ្មី MGI 2024 មកពីប្រទេសឥណ្ឌានាង Rachel ដែលនិយាយឌឺដងមកលើកម្ពុជា ពាក់ព័ន្ធរឿងសណ្តែកដី ខណ:អ្នកគាំទ្រចាត់ទុកថា ជាទង្វើអាក្រក់ខ្លាំងបំផុត៕ អត្ថបទ៖ ចាន់រ៉ា