ឧកញ៉ា យឹម តាស្រង់ សុំឱ្យសប្បុរសជន បន្តសកម្មភាពមនុស្សធម៌ គាំទ្រដល់កងទ័ពជួរមុខ និងជួយជនភៀសសឹក

ឧកញ៉ា យឹម តាស្រង់ អតីតកវីនិពន្ធល្បីឈ្មោះកម្ពុជា បានចេញមុខស្នើនិងលើកទឹកចិត្តសប្បុរសជន បន្តរួមសាមគ្គីគ្នា កុំបាក់ទឹកចិត្ត ដើម្បីជាចំណែកផ្តល់កំលាំងចិត្តជាមួយកងទ័ពជួរមុខ និងពលរដ្ឋភៀសសឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យឹម តាស្រង់ បានរៀបរាប់ដូច្នេះថា កាលប៉ុន្មានថ្ងៃមុន លោកក៏បានចូលរួមចំណែកទុក្ខលំបាកជាមួយកងទ័ពជួរមុខ និងប្រជាជនភៀសសឹកផងដែរ ដ្បិតថា ទង្វើល្អរបស់លោករងពាក្យមិនល្អខ្លះក៏ពិតមែន តែលោកនៅតែជំរុញ និងលើកទឹកចិត្តដល់សប្បុរសជនឱ្យបន្តសកម្មភាពមនុស្សធម៌ដើម្បីជាតិ។

លោកថា ការអំពាវនាវរបស់លោកនេះ គឺបន្ទាប់ពីទទួលដំណឹងថា បច្ចុប្បន្ន មានពលរដ្ឋខ្មែរនៅតំបន់មួយចំនួនចាប់ផ្ដើមរើអីវ៉ាន់ចេញពីស្រុកកំណើតរកកន្លែងសុវត្ថិភាពខ្លះទៀតហើយ។ ដូចនេះ លោកទទូចឱ្យសប្បុរសជនកុំបាក់ទឹកចិត្តនឹងពាក្យឡកឡឺយកន្លងមក ហើយតាំងជំហររឹងមាំទាំងអស់គ្នា ដើម្បីជួយសង្គមជាតិ។

លោកសង្ឃឹមថា សប្បុរសជនទាំងអស់មិនបាក់ទឹកចិត្ត ហើយនៅតែបន្តសាមគ្គី ចូលរួមចំណែកជាមួយកងទ័ពជួរមុខ និងជនភៀសសឹក ក្នុងករណីប្រសិនបើមានការឈ្លានពានពីចោរសៀមទៀត”។ មួយវិញទៀត លោកក៏ស្នើសុំចិត្តអ្នកចាំតែរិះគន់ ប្ដូរពីការអង្គុយក្នុងផ្ទះ ចុះទៅទីតាំងជួយទាំងអស់គ្នា៕ ចាន់រ៉ា