លោក យឹម តាស្រង់ ស្ងើចនឹងភាពចាស់ទុំកូនស្រីនាយក្រិន ខណៈមហាជនរំជួលចិត្តព្រោះភាពរឹងមាំរបស់នាង

ត្រឹមជាកុមារីតូចម្នាក់ តែកូនស្រីពៅរបស់នាយក្រិនមានគំនិតចាស់ទុំ និងរឹងមាំខុសពីកុមារទូទៅ ខណៈគ្រាដែលឪពុកក្ស័យធនគ្មានប្រាក់កាសផ្គត់ផ្គង់គ្រប់គ្រាន់ កុមារីតូចនេះ មិនត្រឹមតែមិនទាមទារឬបន្ទោសឪពុក ថែមទាំងទ្រាំអត់ឃ្លានជាមួយឪពុក ពេលខ្លះហូបអំបិល ឬផឹកទឹកដើម្បីចម្អែតក្រពះ ពេលដែលអត់បាយម្តងៗទៀតផង។

ដោយហេតុនេះហើយ ធ្វើឱ្យសាធារណជនរំជួលចិត្តអាណិតអាសូរ ពិសេសឧកញ៉ា យឹម តាស្រង់ ក៏បង្ហាញអារម្មណ៍កោតស្ញប់ស្ញែងនឹងភាពចាស់ទុំរបស់នាងផងដែរ។

ជាការពិតណាស់បន្ទាប់បាត់វត្តមាន ពីសិល្ប:មួយរយ:ធំកន្លងទៅ តារាកំប្លែងមាឌល្អិតកម្សត់ស្នេហ៍នាយ ក្រិន កាលពីថ្មីៗនេះបានបញ្ជាក់ថាបច្ចុប្បន្នលោកកំពុងរស់នៅជាមួយកូនៗទាំង៣នាក់ឯស្រុកកំណើតខេត្តបាត់ដំបងដោយប្រកបរបរចិញ្ចឹមមាន់ទាដើម្បីបានប្រាក់កម្រៃចិញ្ចឹមខ្លួននិងកូនៗទាំង៣ដែលកំព្រាម្តាយ។

ដោយឡែកអ្វីដែលធ្វើឱ្យមហាជន និង អ្នកគាំទ្រកាន់តែអាណិតនោះ ខណ:ដែលកូនស្រីពៅរបស់តារាកំប្លែងលោក ទេស សុជន ហៅ នាយ ក្រិន ឈ្មោះ អូន បញ្ញា បានរៀបរាប់ពីរឿងរ៉ាវរបស់ខ្លួនដែលរស់នៅកម្សត់ជាមួយឪពុកធ្វើឱ្យអ្នកទស្សនាពោលទប់ទឹកភ្នែកមិនជាប់ ព្រោះតែក្តីអាណិតដល់ពួកគេដែលគ្មានម្តាយ។

តាមរយ:កិច្ចសម្ភាសមួយ កុមារីរូបនេះបាននិយាយទាំងកម្សត់ថា “ពេលអត់បាយហូប នាងនិងបងៗរួមទាំងឪពុក ធ្លាប់ហូបអំបិល ហើយបាយទទេក៏មានដែរ ។ បញ្ញា បន្តថា ពេលអត់បាយនាងទ្រាំបាន ហើយមានទឹកនាងផឹកទឹកឆ្អែត”។

ឃើញកូនស្រីពៅ នាយក្រិន រឹងមាំមានគំនិតចាស់ទុំ ចេះគិតគូរដល់គ្រួសារដូចមនុស្សពេញវ័យ ឧកញ៉ា យឹម តាស្រង់ ពោលសរសើរថា “អ៊ំសូមជូនពរក្មួយស្រីតទៅថ្ងៃមុខអនាគតរុងរឿង ជាសសរទ្រូងសម្រាប់គ្រួសារក្មួយ ក្មួយអាយុនៅក្មេងទេ ប៉ុន្តែចិត្តគំនិតក្មួយគឺប្រពៃជាងមនុស្សមានវ័យធំៗមួយចំនួនផង”។

មហាជននិងអ្នកគាំទ្រកត់សម្គាល់ថា ការបាត់ដំណឹងពីសិល្ប:របស់នាយ ក្រិន នេះគឺ​ចាប់តាំងពី​នាយជួបរឿងអកុសលត្រូវបែកបាក់ភរិយាទី២ ដោយសារលួចផិតក្បត់មានអ្នកថ្មីរហូត​ឈានដល់​ផ្លូវ​លែងលះគ្នា។ មិនតែប៉ុណ្ណោះអាជីពបើកហាងរបស់នាយ ក្រិន ក៏ត្រូវបានបិទទ្វារទាំងស្រុងព្រោះក្ស័យធន។

ដោយសារហេតុផលខាងលើនេះ ទើបកាលពី​ចុងឆ្នាំ​២០១៩ នាយ​ ក្រិន បាន​សម្រេចវេចបង្វិចនិងនាំកូនៗទាំង៣នាក់យ៉ាងកម្សត់ចាកចេញពីរាជធានីភ្នំពេញ ដើម្បីទៅរស់នៅឯស្រុកកំណើតនៅ​ខេត្តបាត់ដំបង៕ អត្ថបទ៖ ចាន់រ៉ា