នៅសល់ព្យុះ ៥-៧ ទៀត នឹងវាយប្រហារអាស៊ីអាគ្នេយ៍ មុនដាច់ឆ្នាំនេះ 

ដ្បិតតែអាស៊ីអាគ្នេយ៍ត្រូវព្យុះជាច្រើនវាយប្រហារជាបន្តបន្ទាប់តកន្ទុយគ្នាក៏ដោយ ប៉ុន្តែមិនទាន់រួចផុតទេ ពោលគឺនៅមានព្យុះចន្លោះពី៥-៧ទៀត ដែលនឹងបោកបក់លើតំបន់នេះ មុនដាច់ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្យុះចំនួន៣ចុងក្រោយដូចជាកាជិគី ប៊ូឡូយនិងម៉ាតម៉ូ បានវាយប្រហារអាស៊ីអាគ្នេយ៍យ៉ាងពេញទំហឹងជាពិសេសហ្វីលីពីន វៀតណាមនិងថៃ ដោយវាបង្កជាគ្រោះទឹកជំនន់ បំណាក់ដី និងឈានដល់ធ្វើឲ្យបាក់ធ្លាយទំនប់ទៀតផង។

ឥទ្ធិពលរបស់ព្យុះទាំង៣ បណ្តាលឲ្យមនុស្សរាប់រយនាក់នៅអាស៊ីអាគ្នេយ៍បាត់បង់ជីវិត រាប់សែននាក់ជម្លៀសខ្លួន និងរាប់លាននាក់ ត្រូវរងទុក្ខវេទនា។

យ៉ាងណា ស្ថានភាពនឹងមិនទាន់ធូរស្រាលឡើយ ព្រោះថា ព្យុះ៥-៧ទៀតនឹងចូលមកដល់ មុនដាច់ឆ្នាំ ហើយព្យុះនៅសល់ទាំងនេះ ត្រូវគេព្យាករថា ប្រហែលវាយប្រហារប្រទេសវៀតណាម ខ្លាំងជាងគេ។

តាមការផ្សាយរបស់គេហទំព័រ Vietnam.vn កាលពីដើមសប្តាហ៍, អគ្គនាយករងនៃនាយកដ្ឋានជលសាស្ត្រក្រោមក្រសួងកសិកម្មនិងបរិស្ថានបានឲ្យដឹងថា ចាប់ពីពេលនេះរហូតដល់ដំណាច់ឆ្នាំ២០២៥ ត្រូវតែមានការយកចិត្តទុកដាក់ខ្លាំងលើស្ថានភាពសំខាន់ៗដូចជាខ្យល់ព្យុះ ទឹកជំនន់ និងខ្យល់ត្រជាក់។ ក្នុងចំណោមព្យុះដែលនៅសល់ នឹងមានខ្លះវាយប្រហារដីគោកវៀតណាម ជាពិសេសភាគកណ្តាលដល់ខាងត្បូង។

សូមជម្រាបជាថ្មី ឥទ្ធិពលព្យុះ ប៊ូឡូយ បានបណ្តាលឲ្យមនុស្សស្លាប់ចំនួន៥១នាក់នៅវៀតណាម ខណៈទឹកជំនន់និងបំណាក់ដីបានបំផ្លាញផ្ទះសម្បែងជាង ២០០ ០០០ខ្នងទូទាំងប្រទេស និងកម្ទេចសំណង់ហេដ្ឋារចនាសម្ព័ន្ធនានា។

ស្របពេលជាមួយគ្នានោះដែរ ក្រសួងបរិស្ថានវៀតណាម បានវាយតម្លៃថា ការខាតបង់សេដ្ឋកិច្ចបណ្តាលមកពីព្យុះ ប៊ូឡូយ គឺមានប្រហែល ៦០៦លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ វៀតណាមធ្ងន់ធ្ងរ! ព្យុះចាស់សម្លាប់មនុស្ស៥១នាក់ ខណៈព្យុះថ្មីក៏មកដល់