ប៉ាគីស្ថាន ព្រមានពី «សង្គ្រាមបើកចំហ» ជាមួយអាហ្វហ្គានីស្ថាន ប្រសិនបើការចរចាសន្តិភាពបរាជ័យ

រដ្ឋមន្ត្រីក្រសួងការពារជាតិប៉ាគីស្ថាន លោក Khawaja Muhammad Asif បានព្រមានថា ប្រសិនបើការចរចាបរាជ័យ អាចមាន «សង្គ្រាមបើកចំហ» រវាងប្រទេសទាំងពីរ ទោះបីជាលោកជឿថាអាហ្វហ្គានីស្ថានចង់បានសន្តិភាពក៏ដោយ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៦ខែតុលារ។

ប៉ាគីស្ថាន និងអាហ្វហ្គានីស្ថានកំពុងជួបគ្នានៅទីក្រុងអ៊ីស្តង់ប៊ុល ប្រទេសតួកគី ដើម្បីពិភាក្សាអំពីរបៀបរក្សាបទឈប់បាញ់ថ្មីៗនេះឱ្យនៅដដែល បន្ទាប់ពីការប៉ះទង្គិចគ្នាដ៏សាហាវនៅព្រំដែនសម្លាប់មនុស្សរាប់សិបនាក់។

ការចរចានេះគាំទ្រដោយប្រទេសកាតា និងតួកគី មានគោលបំណងស្វែងរកដំណោះស្រាយរយៈពេលវែងចំពោះការប្រយុទ្ធគ្នា។ ប៉ាគីស្ថានចោទប្រកាន់អាហ្វហ្គានីស្ថានថាអនុញ្ញាតឱ្យអ្នកប្រយុទ្ធតាលីបង់ប៉ាគីស្ថាន (TTP) ធ្វើប្រតិបត្តិការពីទឹកដីរបស់ខ្លួន ខណៈដែលអាហ្វហ្គានីស្ថានបដិសេធរឿងនេះ ហើយបន្ទោសប៉ាគីស្ថានចំពោះការវាយប្រហារតាមអាកាសដែលឆ្លងកាត់ព្រំដែន។

គួរបញ្ជាក់ថាការប្រយុទ្ធគ្នារវាងប្រទេសទាំងពីរបានធ្វើឲ្យពាណិជ្ជកម្មរវាងប្រទេសទាំងពីរត្រូវបានរងផលប៉ះពាល់យ៉ាងធ្ងន់ធ្ងរ ដោយច្រកព្រំដែនត្រូវបានបិទ និងអាជីវកម្មខាតបង់រាប់លានដុល្លារជារៀងរាល់ថ្ងៃ។ អ្នកជំនាញនិយាយថា ភាគីទាំងពីរកំពុងពិភាក្សាអំពីវិធីចែករំលែកព័ត៌មានស៊ើបការណ៍សម្ងាត់ និងជៀសវាងជម្លោះនាពេលអនាគត។ សម្រាប់ពេលនេះ បទឈប់បាញ់នៅតែដំណើរការ ហើយប្រទេសទាំងពីរសង្ឃឹមថាការចរចានៅទីក្រុងអ៊ីស្តង់ប៊ុលនឹងនាំមកនូវសន្តិភាពយូរអង្វែង៕

អត្ថបទ៖ ប៊ុន សុភាព