ថៃ៖ អាស៊ាន​នឹង​ចុះ​ស៊ើប​អង្កេត​នៅ​នឹង​កន្លែង​ដែល​ទាហាន​ថៃ​ជាន់​មីនផ្ទុះថ្មីៗ​នេះ

ប្រទេសថៃបាននិយាយថា អ្នកសង្កេតការណ៍អាស៊ាននឹង​ចុះ​ស៊ើបអង្កេតការផ្ទុះគ្រាប់មីនតាមបណ្តោយព្រំដែនជម្លោះកម្ពុជា–ថៃ នៅថ្ងៃទី១៤ខែវិច្ឆិកា​ឆ្នាំ​២០២៥ ខណៈដែលឧបទ្ទវហេតុនេះកំពុងគំរាមកំហែងដល់កិច្ចព្រមព្រៀងឈប់បាញ់ដែលសម្របសម្រួលដោយសហរដ្ឋអាមេរិក។

ថៃបានព្យួរកិច្ចព្រមព្រៀងឈប់បាញ់ ហើយទាមទារការសុំទោសពីកម្ពុជា បន្ទាប់ពីចោទប្រកាន់កម្ពុជាថាបានដាក់គ្រាប់មីនប្រភេទ PMN-2 ថ្មី។ គ្រាប់មីនមួយគ្រាប់បានធ្វើ​ឲ្យទាហានថៃម្នាក់រងរបួសធ្ងន់កាលពីថ្ងៃទី១០ ខែវិច្ឆិកា ដែលស្ថិតនៅទល់មុខខេត្តព្រះវិហាររបស់កម្ពុជា។

កម្ពុជាបានបដិសេធថា​ ខ្លួនមិនបានដាក់គ្រាប់មីនថ្មីនោះទេ ហើយបានជំរុញ​ឲ្យ​ប្រទេសថៃប្រកាន់ខ្ជាប់នូវកិច្ចព្រមព្រៀងឈប់បាញ់ដែលបានចុះហត្ថលេខានៅប្រទេសម៉ាឡេស៊ីកាលពីចុងខែតុលា។ ក្រោម​កិច្ច​ព្រម​ព្រៀង​នោះ អាស៊ាន​បាន​បង្កើត​ក្រុម​អ្នក​សង្កេត​ការណ៍​យោធា ​ដើម្បី​តាម​ដាន​ភាគី​ទាំង​ពីរ និង​ជួយ​កាត់​បន្ថយ​ភាព​តាន​តឹង។

កាលពីថ្ងៃទី១៣ ខែវិច្ឆិកា រដ្ឋមន្ត្រីការបរទេសម៉ាឡេស៊ី លោក Mohamad Hasan បាននិយាយថា «ខ្ញុំទើបតែទូរសព្ទជាមួយរដ្ឋមន្ត្រីការបរទេសថៃរួច។ ក្តីសង្ឃឹមរបស់ខ្ញុំគឺចង់​ឲ្យ​​ភាគីទាំងពីរស្ងប់ស្ងាត់ និងបន្តកិច្ចចរចាសន្តិភាព»។

យោង​តាម​​កា​រ​ចុះ​ផ្សាយ​របស់​រ៉យទ័រ ក្រុមអ្នកសង្កេតការណ៍​មួយ​ក្រុម​ទៀត​គ្រោងនឹងចុះ​ទៅ​តំបន់ជម្លោះដែលការបាញ់ប្រហារបានផ្ទុះឡើងកាលពីថ្ងៃទី​១១ ខែវិច្ឆិកា។ យ៉ាងហោចណាស់ជនជាតិខ្មែរម្នាក់ត្រូវបានសម្លាប់ និង៣នាក់ផ្សេងទៀតរងរបួស។

ភាពតានតឹងរវាងប្រទេសជិតខាងទាំងពីរបានក្លាយ​ទៅជាការប្រយុទ្ធគ្នារយៈពេល៥​ថ្ងៃកាលពីខែកក្កដា ដែលបណ្តាល​ឲ្យ​មនុស្សយ៉ាងតិច​៤៨នាក់ស្លាប់ និងបង្ខំ​ឲ្យ​មនុស្សប្រហែល ៣០០ ០០០​នាក់ភៀសសឹក មុនពេលឈានដល់កិច្ចព្រមព្រៀងឈប់បាញ់តាមរយៈកិច្ចចរចាដែលដឹកនាំដោយប្រធានាធិបតីអាមេរិក លោក ដូណាល់ ត្រាំ និងនាយករដ្ឋមន្ត្រីម៉ាឡេស៊ី លោក Anwar Ibrahim។

ការផ្ទុះគ្រាប់មីនបានក្លាយជាកត្តាបង្កដ៏សំខាន់នៃជម្លោះនាពេលថ្មីៗនេះ។ ចាប់តាំងពីថ្ងៃទី១៦ ខែកក្កដា មក ទាហានថៃយ៉ាងតិច៧នាក់បានរងរបួសធ្ងន់ដោយសារគ្រាប់មីនតាមព្រំដែន។

កម្ពុជា និង​ថៃ​ បាន​កើត​មាន​បញ្ហា​នៅ​ផ្នែកខ្លះនៃព្រំដែនគោកប្រវែង៨១៧គីឡូម៉ែត្រ​អស់រយៈពេលជាងមួយសតវត្សរ៍មកហើយ។ ព្រំដែននេះត្រូវបានគូសដំបូងដោយប្រទេសបារាំងក្នុងឆ្នាំ១៩០៧ នៅពេលដែលកម្ពុជាស្ថិតនៅក្រោមអាណានិគម៕

ប្រែសម្រួល៖ ឈាង