ខេត្តភាគខាងជើងថៃ កើតរញ្ជួយដី លាន់ស្នូរដូចការផ្ទុះ ខណៈ៩ស្រុក ចេញការព្រមាន

ខេត្ត Phayao ភាគខាងជើងប្រទេសថៃ បានជួបគ្រោះរញ្ជួយដីកម្រិត២.៨រ៉ិចទ័រ ជាមួយជម្រៅ ៦គីឡូម៉ែត្រ បណ្តាលឲ្យរង្គើដល់តំបន់មួយចំនួន ឈានដល់ការព្រមានសម្រាប់ស្រុកចំនួន៩។

តាមការផ្សាយរបស់ The Nation, រញ្ជួយដីនេះកើតឡើងនៅម៉ោង៩:៥៨នាទីយប់ ថ្ងៃពុធទី១០ខែធ្នូឆ្នាំ២០២៥ ដោយមានចំណុចកណ្តាលនៅឃុំ Fai Kwang នៃស្រុក Chiang Kham ហើយវាបង្កជាសំឡេងប្រៀបដូចការផ្ទុះនៅទីនោះផងដែរ។

ដ្បិតវាមានកម្រិតស្រាល ប៉ុន្តែការិយាល័យបង្ការនិងកាត់បន្ថយគ្រោះមហន្តរាយខេត្ត បានព្រមានដល់ស្រុកចំនួន៩ ឲ្យតាមដានស្ថានការណ៍និងវាយតម្លៃការខូចខាត ពីរញ្ជួយដីនេះ។

អ្នកស្រុក Chiang Kham បានប្រាប់ថា ពួកគេមានអារម្មណ៍ថា ញ័ររង្គើនិងលាន់ស្នូរប្រៀបដូចជាការផ្ទុះ។

សូមជម្រាបថា តំបន់ស្នាមប្រេះសកម្មជាច្រើន បានលាតសន្ធឹងកាត់តាមភាគខាងជើងប្រទេសថៃ ក្នុងនោះរួមមានទាំង តំបន់ស្នាមប្រេះ Phayao ផងដែរ។

រញ្ជួយដីតូចៗ ដូចជាការរញ្ជួយកម្រិត២.៨រ៉ិចទ័រ នៅខេត្ត Phayao បង្ហាញថា ស្នាមប្រេះទាំងនេះ នៅតែមានថាមពលនិងកំពុងធ្វើចលនាយឺតៗ ដ្បិតការរញ្ជួយដីនោះមានកម្រិតស្រាលៗក៏ដោយ៕

អត្ថបទ៖ សុខ សុវណ្ណ