រក​ឃើញ​ស្លាបព្រា​ក្នុង​ធាតុ​ពលទាហាន​ថៃ​ម្នាក់ សង្ស័យ​​រង​ទារុណកម្ម​ព្រៃផ្សៃ​ក្នុងជួរកងទ័ព

ការបាត់បង់​ជីវិត​របស់ពលទាហាន Pecharat Kamlangying បានបង្ក​ឲ្យ​មានភាពចម្រូងចម្រាសកាន់តែខ្លាំងជុំវិញការធ្វើទារុណកម្មក្នុងជួរកងទ័ពថៃ បន្ទាប់ពីមានការរកឃើញស្លាបព្រា​ធ្វើ​ពី​លោហៈ​មួយ​នៅក្នុងធាតុ​អ្នក​ស្លាប់ក្រោយបូជាសព។​ នេះ​បើ​យោង​​តាម​ការ​ចុះ​ផ្សាយ​របស់​សារព័ត៌មាន Thai Equirer នា​ថ្ងៃទី​២៣​ខែ​កុម្ភៈ​ឆ្នាំ​២០២៦។

ទោះបីជាកងទ័ពអះអាងថា ការស្លាប់ក្នុងអំឡុងពេលជាប់ពិន័យនេះបណ្តាលមកពីខ្សោយបេះដូង និងគ្មានវត្ថុចម្លែកក្នុងខ្លួនក៏ដោយ ក៏​រដ្ឋមន្ត្រីការពារជាតិ​លោក Natthapon Nakpanich បានចេញមុខសន្យាថា បើរកឃើញភស្តុតាងនៃការធ្វើបាបមែន នោះអ្នកពាក់ព័ន្ធនឹងត្រូវកាត់ទោសតាមច្បាប់ប្រឆាំងការធ្វើទារុណកម្ម។

ភាគីបក្សប្រឆាំង និង​ក្រុម​គ្រួសារជនរងគ្រោះ បានបង្កើនការទាមទារ​​ឲ្យ​មានតម្លាភាព ដោយចោទសួរថា ហេតុអ្វីបានជាអ្នកជាប់ឃុំត្រូវបានអនុញ្ញាត​ឲ្យ​កាន់ស្លាបព្រាដែលគេអាចយកទៅច្នៃជាអាវុធបាន។ ពួកគេបានទាមទារ​ឲ្យ​បង្ហាញវីដេអូសុវត្ថិភាព (CCTV) និងកំណត់ត្រាវេជ្ជសាស្ត្រដែលត្រឹមត្រូវ ព្រោះរូបភាព X-ray ដែលបានបញ្ចេញពីមុនខ្វះព័ត៌មានអត្តសញ្ញាណ។

លោក Natthapon បានទទួលស្គាល់ថា ដ្បិត​កងទ័ពធ្លាប់ទទួលបានការកោតសរសើរចំពោះប្រតិបត្តិការនៅតាមព្រំដែនកម្ពុជាក៏ដោយ តែ​ការចោទប្រកាន់ពីការធ្វើទារុណកម្មបែបនេះ កំពុងធ្វើ​ឲ្យ​ខូចកេរ្តិ៍ឈ្មោះស្ថាប័នយ៉ាងធ្ងន់ធ្ងរ។

ក្រសួងការពារជាតិថៃ​បានផ្តល់ឱកាស​ឲ្យ​ក្រុមគ្រួសារស្វែងរកការពិនិត្យបន្ថែមពីភាគីឯករាជ្យ បើនៅតែមានមន្ទិលសង្ស័យ។ ខណៈការស៊ើបអង្កេតកំពុងបន្ត ករណីនេះ​បាន​រង​ការរិះគន់​យ៉ាង​ចាស់ដៃ ដែលទាមទារ​ឲ្យ​មានការត្រួតពិនិត្យកាន់តែតឹងរ៉ឹងលើការដាក់ពិន័យក្នុងជួរយោធា ដើម្បីបង្ការកុំ​ឲ្យ​មានការធ្វើទារុណកម្ម និងអំពើហិង្សាក្រៅច្បាប់តទៅទៀត៕

ប្រែសម្រួល៖ ឈាង