នាយករដ្ឋមន្ត្រីអេស្ប៉ាញ ធានាថា អេស្ប៉ាញជាសមាជិកណាតូដ៏គួរឲ្យទុកចិត្ត

នាយករដ្ឋមន្ត្រីអេស្ប៉ាញ លោក Pedro Sanchez បាន​​លើក​ឡើង​ថា​ ប្រទេសអេស្ប៉ាញគឺជា «សមាជិកណាតូដ៏គួរឲ្យទុកចិត្ត» បន្ទាប់ពីមានសេចក្តីរាយការណ៍ថា សហរដ្ឋអាមេរិកកំពុងពិចារណា​ព្យួរ​សមាជិកភាព​​របស់​ខ្លួន​ ក្នុងនាមជាសម្ព័ន្ធមិត្តនៅក្នុងសម្ព័ន្ធភាពយោធា​នៃ​អង្គការ​ណា​​តូ (NATO)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយដោយ BBC លោក Sanchez បានប្រាប់អ្នកយកព័ត៌មាននៅប្រទេសស៊ីប (Cyprus) កាលពីថ្ងៃទី២៤ខែមេសាថា «ប្រទេសអេស្ប៉ាញគឺជាសមាជិកដែលអាចទុកចិត្តបានរបស់អង្គការណាតូ» ដោយសង្កត់ថា ទីក្រុង​ម៉ាឌ្រីដ​កំពុងបំពេញកាតព្វកិច្ចពេញលេញរបស់ខ្លួន! ដូច្នេះហើយ ខ្ញុំមិនមានការព្រួយបារម្ភទាល់តែសោះ»។

ការអត្ថាធិប្បាយរបស់លោក Sanchez បានកើតឡើងភ្លាមៗ បន្ទាប់ពីទីភ្នាក់ងារសារព័ត៌មាន Reuters បានដកស្រង់សម្តីមន្ត្រីអាមេរិកម្នាក់ថា មន្ទីរបញ្ចកោណមានអ៊ីមែលផ្ទៃក្នុងដែលគូសបញ្ជាក់ពីវិធានការដែលអាចធ្វើទៅបានប្រឆាំងនឹងសម្ព័ន្ធមិត្តដែលមិនគាំទ្រប្រតិបត្តិការយោធារបស់សហរដ្ឋអាមេរិក រួមទាំងប្រឆាំងនឹងប្រទេសអេស្ប៉ាញផងដែរ។

លោក Sanchez បានបន្តថា «យើងមិនធ្វើសកម្មភាពលើអ៊ីមែលដែលលេចធ្លាយទេ ប៉ុន្តែផ្អែកលើឯកសារផ្លូវការ និងជំហររបស់រដ្ឋាភិបាល ដែលក្នុងករណីនេះគឺសហរដ្ឋអាមេរិក»។ លោកបានបន្ថែមថា ទីក្រុងម៉ាឌ្រីដរក្សាជំហរនៃ កិច្ចសហប្រតិបត្តិការដាច់ខាតជាមួយសម្ព័ន្ធមិត្ត ប៉ុន្តែតែងតែស្ថិតនៅក្នុងក្របខ័ណ្ឌនៃច្បាប់អន្តរជាតិជានិច្ច៕

អត្ថបទ៖ សាង ស្រីល័ក្ខ