ព័ត៌មានអន្ដរជាតិ

នៅខែមេសា អេស្ប៉ាញបើកការដាក់ពាក្យទទួលយកជនអន្តោប្រវេសន៍ដល់៥០ម៉ឺននាក់

បានផុស

៦ ខែ មុន

នៅ

ថ្ងៃពុធ ២៨ មករា ២០២៦

ដោយ

ក្រោយការវិលចូលកាន់អំណាចប្រធានាធិបតីសហរដ្ឋអាមេរិកលើកទី២ ប្រធានាធិបតី ដូណាល់ ត្រាំ បានចេញគោលការណ៍ដ៏តឹងរឹងមួយ ក្នុងការបណ្តេញជនចំណាកស្រុកពីប្រទេសខ្លួន ខណៈមានរបាយការណ៍ផ្សេងៗទៀតថា អាមេរិកពើបប្រទះនូវអត្រាចំនួនប្រជាជនធ្លាក់ចុះខ្លាំងជាលើកដំបូង។

ឆ្លៀតក្នុងឱកាសនេះ ប្រទេសអេស្ប៉ាញ បានប្រកាសថា ខ្លួននឹងផ្តល់ការរស់នៅស្របច្បាប់ដល់ជនចំណាកស្រុកចំនួន ៥០០ ០០០នាក់ ក្នុងការផ្លាស់ប្តូរប្រឆាំងនឹងនិន្នាការ និងគោលនយោបាយជនអន្តោប្រវេសន៍នៅក្នុងសហរដ្ឋអាមេរិក។

លោកស្រី Elma Saiz រដ្ឋមន្ត្រីក្រសួងអន្តោប្រវេសន៍របស់ប្រទេសអេស្ប៉ាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម CNN, ការផ្លាស់ប្តូរនេះត្រូវបានប្រកាសកាលពីថ្ងៃអង្គារ គឺសំដៅដល់ការកាត់បន្ថយការកេងប្រវ័ញ្ចកម្លាំងពលកម្ម សេដ្ឋកិច្ចរបស់ប្រទេសអេស្ប៉ាញ។

គួរបញ្ជាក់ថា ធនាគារកណ្តាលរបស់ប្រទេសអេស្ប៉ាញ និងអង្គការសហប្រជាជាតិ ធ្លាប់បានលើកឡើងពីមុនថា ប្រទេសអេស្ប៉ាញត្រូវការកម្មករចំណាកស្រុកប្រហែល ៣០០ ០០០នាក់ ក្នុងមួយឆ្នាំ ដើម្បីទ្រទ្រង់ស្ថានភាពសុខុមាលភាពរបស់ប្រទេសនេះ។

លោកស្រី Elma Saiz រដ្ឋមន្ត្រីក្រសួងអន្តោប្រវេសន៍របស់ប្រទេសអេស្ប៉ាញ បានប្រាប់សន្និសីទសារព័ត៌មានមួយថា៖ «ថ្ងៃនេះជាថ្ងៃប្រវត្តិសាស្ត្រសម្រាប់ប្រទេសរបស់យើង។ យើងកំពុងពង្រឹងគោលការណ៍ចំណាកស្រុកដោយផ្អែកលើសិទ្ធិមនុស្ស សមាហរណកម្ម ការរួមរស់ជាមួយគ្នា និងភាពយោគយល់អធ្យាស្រ័យជាមួយនឹងកំណើនសេដ្ឋកិច្ច ពិសេសទំនាក់ទំនងសង្គម»។

លោកស្រី Saiz បានបន្តថា៖«វិធានការថ្មីគឺចាំបាច់ដើម្បីឆ្លើយតបទៅនឹងការពិតដែលមាននៅលើដៃរបស់យើង ហើយអ្នកទាំងនោះនឹងផ្តល់អត្ថប្រយោជន៍ដល់សេដ្ឋកិច្ចប្រទេសយើងជាពុំខាន»។

រដ្ឋមន្ត្រីរូបនេះបន្ថែមថា៖ «វិធានការនេះនឹងអនុញ្ញាតឱ្យមានជីវិតថ្លៃថ្នូរសម្រាប់ជនចំណាកស្រុក»។

គួរបញ្ជាក់ ជនបរទេសដែលបានមកដល់ប្រទេសអេស្ប៉ាញមុនថ្ងៃទី៣១ខែធ្នូ ឆ្នាំ ២០២៥ អាចបញ្ជាក់ថា ខ្លួនបានរស់នៅក្នុងប្រទេសនេះ យ៉ាងហោចណាស់៥ខែ បន្ទាប់មកពួកគេនឹងទទួលបានសិទ្ធិស្នាក់នៅស្របច្បាប់រហូតដល់១ឆ្នាំ ជាពិសេសមានលិខិតអនុញ្ញាតការងារដែលមានសុពលភាពសម្រាប់គ្រប់វិស័យ និងទូទាំងប្រទេស។ ជាងនេះទៅទៀត ជនបរទេសទាំងអស់នោះនឹងត្រូវបញ្ជាក់ថា «ខ្លួនមិនធ្លាប់បទល្មើសនានា»។

ប្រជាពលរដ្ឋនឹងអាចដាក់ពាក្យចូលមកនៅប្រទេសអេស្ប៉ាញបាន ចាប់ពីដើមខែមេសា រហូតដល់ថ្ងៃទី៣០ខែមិថុនា ឆ្នាំ២០២៦៕

ប្រែសម្រួល៖ ណឺ មិនា