IAEA៖ អ៊ីរ៉ង់ មានអ៊ុយរ៉ាញ៉ូម សម្រាប់ផលិតគ្រាប់បែកនុយក្លេអ៊ែរបាន ១០គ្រាប់

តាម​របាយការណ៍​ពី Independent ចុះផ្សាយ​ថ្ងៃទី​៣០ ខែមេសា ឆ្នាំ​២០២៦ មេដឹកនាំទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បានបង្ហាញក្ដីបារម្ភយ៉ាងខ្លាំងថា បច្ចុប្បន្ន ប្រទេសអ៊ីរ៉ង់មានសារធាតុអ៊ុយរ៉ាញ៉ូមចម្រាញ់កម្រិតខ្ពស់ច្រើនសន្ធឹកសន្ធាប់ ដែលអាចយកទៅផលិតជាគ្រាប់បែកនុយក្លេអ៊ែរ បានរហូតដល់ទៅ ១០គ្រាប់។

បើតាមរូបភាពផ្កាយរណប សារធាតុដ៏គ្រោះថ្នាក់ទាំងនេះត្រូវបានគេជឿថា កំពុងលាក់ទុកយ៉ាងជិត នៅក្នុងរូងភ្នំនៃមជ្ឈមណ្ឌល​នុយក្លេអ៊ែរ Isfahan បន្ទាប់ពីមានឡាន​ជាច្រើនគ្រឿងបានដឹកជញ្ជូនកុងតឺន័រចំនួន​១៨ ដែល​សង្ស័យ​ថា​ជា​សារធាតុ​អ៊ុយរ៉ាញ៉ូម ចូលទៅក្នុងជម្រកក្រោមដី កាល​ពី​ថ្ងៃទី​៩ ខែមិថុនា ឆ្នាំ​២០២៥ មក​ម៉្លេះ ពោល​គឺ​តាំងពីមុនពេលសង្រ្គាមផ្ទុះឡើងទៅ​ទៀត។

ដ្បិត​អាមេរិក និងអ៊ីស្រាអែលបានបើកការវាយប្រហារតាមអាកាសជាបន្តបន្ទាប់ ប៉ុន្តែស្ដុកអ៊ុយរ៉ាញ៉ូមទាំងនេះហាក់មិនទាន់រងការបំផ្លិចបំផ្លាញឡើយ ខណៈដែលក្រុមអធិការកិច្ចអន្តរជាតិមិនត្រូវបានអនុញ្ញាតឲ្យ​ចូលទៅពិនិត្យផ្ទាល់តាំងពីពាក់កណ្ដាលឆ្នាំ ២០២៥។ លោក Grossi បានបញ្ជាក់ថា កម្រិតចម្រាញ់អ៊ុយរ៉ាញ៉ូមរបស់អ៊ីរ៉ង់នៅពេលនេះ គឺស្ថិតក្នុងដំណាក់កាលបច្ចេកទេសមួយដ៏កៀកបំផុត ក្នុងការផលិតអាវុធមហាប្រល័យ។

ចំណុចនេះហើយដែលជាហេតុផលចម្បងធ្វើឲ្យ​ប្រធានាធិបតី ដូណាល់ ត្រាំ បន្តយុទ្ធនាការយោធា និងការបិទខ្ទប់សេដ្ឋកិច្ចយ៉ាងតឹងរ៉ឹង ដើម្បីបង្ខំឲ្យ​អ៊ីរ៉ង់បោះបង់ចោលកម្មវិធីនុយក្លេអ៊ែរនេះជាដាច់ខាត។ ទោះជាយ៉ាងណា ការចរចានៅតែស្ថិតក្នុងភាពទាល់ច្រកនៅឡើយ ដោយសារភាគីទាំងសងខាងមិនទាន់ចុះសម្រុងគ្នាលើលក្ខខណ្ឌនៃការដកទណ្ឌកម្ម និងការបញ្ឈប់ការចម្រាញ់សារធាតុវិទ្យុសកម្មទាំងនេះ៕

ប្រែសម្រួល៖ ឈាង