ខ្លាំងទៅៗហើយ! អ៊ីស្រាអែល នៅតែប៉ុនប៉ងសម្លាប់មេដឹកនាំយោធាកំពូលរបស់ក្រុមហាម៉ាស ក្រោយរួចខ្លួន ៥ ដងមកហើយ

ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីថ្ងៃអង្គារថា ប្រទេសអ៊ីស្រាអែល បានព្យាយាមសម្លាប់មេដឹកនាំយោធាកំពូល របស់ក្រុមហាម៉ាសចំនួន ២ ដងមកហើយ ចាប់តាំងពីថ្ងៃទី ១០ ខែឧសភា ខណៈនៅតែបន្តការវាយប្រហារ ប្រឆាំងនឹងតំបន់ហ្គាហ្សាស្ទ្រីប ។

កាសែត The Times of Israel បានដកស្រង់ប្រភពព័ត៌មាន ចារកម្មរបស់អ៊ីស្រាអែល ដែលបាននិយាយថា កងទ័ពបានបរាជ័យ ក្នុងការធ្វើឃាតលោក Muhammad Deif ប្រធានក្រុមយោធា Easeddin al-Qassam Brigade របស់ក្រុមហាម៉ាស ប៉ុន្តែមិនបានផ្តល់ព័ត៌មានលម្អិតបន្ថែមនោះទេ ។

សេចក្តីថ្លែងការណ៍និយាយថា ការសម្លាប់ Deif គឺស្ថិតនៅលើគោលដៅចម្បង និងសំខាន់របស់អ៊ីស្រាអែល ក្នុងអំឡុងការវាយប្រហារដែលកំពុងបន្ត នៅលើតំបន់ហ្គាហ្សា ។

អស់រយៈពេលជាង ២៥ ឆ្នាំមកហើយ ដែលលោក Deif ត្រូវបានគេចាត់ទុកថាជា ឥស្សរជនកំពូលម្នាក់របស់ប៉ាឡេស្ទីន ដែលអ៊ីស្រាអែលចង់បានបំផុត ។ គាត់បានរួចផុតពីការប៉ុនប៉ងធ្វើឃាត របស់អ៊ីស្រាអែល ៥ ដងមកហើយក្នុងឆ្នាំ ២០០១, ២០០២, ២០០៣, ២០០៦ និងឆ្នាំ ២០១៤ នៅពេលភរិយារបស់គាត់ កូនស្រីអាយុ ៣ ឆ្នាំ និងកូនតូចត្រូវបានសម្លាប់ នៅក្នុងការប៉ុនប៉ងធ្វើឃាតនោះ ។

យោងតាមតួលេខ ពីក្រសួងសុខាភិបាលប៉ាឡេស្ទីន បានឲ្យដឹងថា ចំនួនអ្នកស្លាប់នៅក្នុងតំបន់ហ្គាហ្សា បានកើនឡើងដល់ ២១៧ នាក់ គិតត្រឹមល្ងាចថ្ងៃអង្គារ ក្នុងនោះមានកុមារចំនួន ៦៣ នាក់ និងស្ត្រី ៣៦ នាក់ ខណៈមានអ្នករងរបួសប្រមាណ ១,៥០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ កងទ័ព អ៊ីស្រាអែល បាញ់ទម្លាក់យន្តហោះដ្រូន សង្ស័យជារបស់ប៉ាឡេស្ទីន ក្បែរជ្រលងភ្នំហ្ស៊កដានីនៃតំបន់ West Bank

ចុចអាន ៖ អ៊ីស្រាអែល បន្តវាយប្រហារពាសពេញតំបន់ហ្គាហ្សា និង West Bank ហើយថែមទាំងកម្ទេចផ្លូវរូងក្រោមដីរបស់ក្រុមហាម៉ាស