មិនទាន់ផុតទេ! ឥណ្ឌា កំពុងជួបព្យុះស៊ីក្លូនថ្មីមួយទៀត ខណៈអ្នកស្លាប់ដោយព្យុះ Tauktae កើនដល់ ១១០ នាក់

អ្នកព្យាករណ៍បានព្រមាន នៅថ្ងៃព្រហស្បតិ៍នេះថា ព្យុះដ៏ធំថ្មីមួយទៀត កំពុងបោកបក់នៅឈូងសមុទ្រ Bengal នៃឆ្នេរសមុទ្រភាគខាងកើតរបស់ឥណ្ឌា ពោលប៉ុន្មានថ្ងៃ បន្ទាប់ពីព្យុះស៊ីក្លូនខ្លាំងបំផុត Tauktae វាយប្រហារភាគខាងលិចនៃប្រទេស ក្នុងរយៈពេលមួយទស្សវត្សរ៍មកនេះ ដោយបណ្តាលឲ្យមនុស្សយ៉ាងតិច ១១០ នាក់បានស្លាប់ ។

ព្យុះស៊ីក្លូន Tauktae ដែលបានបោកបក់ឆ្នេរសមុទ្រភាគខាងលិច របស់ប្រទេសឥណ្ឌាកាលពីល្ងាចថ្ងៃចន្ទ បានកម្ទេចបង្អួចផ្ទះនៅតាមមាត់សមុទ្រ ផ្តួលរំលំបង្គោលភ្លើង និងដើមឈើរាប់ពាន់ដើម ក៏ដូចជាបិទផ្លូវដែលឆ្ពោះទៅតំបន់រងគ្រោះ ស្របពេលប្រជាជាតិនេះកំពុងរងទុក្ខខ្លាំង ដោយសារវិបត្តិជំងឺកូវីដ ១៩ រលកទី ២ ដ៏សាហាវ ។

ក្រុមមន្រ្តីបាននិយាយថា ខ្យល់បក់ក្នុងល្បឿនរហូតដល់ទៅ ១៨៥ គីឡូម៉ែត្រក្នុងមួយម៉ោង បានបំផ្លាញផ្ទះសម្បែងជាង ១៦,៥០០ ខ្នង ដើមឈើ ៤០,០០០ ដើមត្រូវផ្តួលរំលំ ហើយភូមិជិត ៦,០០០ ភូមិ ត្រូវគ្មានអគ្គិសនីប្រើប្រាស់ ។

ទន្ទឹមនោះ នៅក្នុងការព្រមានចុងក្រោយរបស់ខ្លួន នាយកដ្ឋានឧតុនិយមឥណ្ឌា បាននិយាយថា តំបន់ដែលមានសម្ពាធទាប នៅឈូងសមុទ្រ Bengal ក្បែរឆ្នេរខាងកើតរបស់ឥណ្ឌា ទំនងជានឹងរងការវាយដោយព្យុះស៊ីក្លូនថ្មី នៅថ្ងៃសៅរ៍ខាងមុខនេះ ។

នាយកដ្ឋានបន្តថា ប្រព័ន្ធសម្ពាធនេះ ទំនងជានឹងធ្វើឲ្យព្យុះបក់បោកបន្តិចម្តងៗ ក្លាយទៅជាព្យុះស៊ីក្លូនដ៏ខ្លាំងក្លា ហើយនឹងទៅដល់ឆ្នេរភាគខាងលិចនៃរដ្ឋ West Bengal និង Odisha នៅថ្ងៃទី ២៦ ឧសភា ខាងមុខផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ឥណ្ឌា រងទុក្ខខ្លាំង! ព្យុះបិសាច សម្លាប់មនុស្សកើនដល់ ៣៣ នាក់ ខណៈ ៩០ នាក់កំពុងបាត់ខ្លួន

ចុចអាន ៖ ឥណ្ឌា ជួបព្យុះស៊ីក្លូនខ្លាំងបំផុត សម្លាប់និងជម្លៀសមនុស្សរាប់ម៉ឺននាក់ទៀត