ក្ដៅៗ រកឃើញបំណែកយន្តហោះ រុស្ស៊ី ដែលធ្លាក់ ខណៈអ្នកដំណើរទាំងអស់គ្មានសង្ឃឹមនៅមានជីវិត

ក្រុមមន្រ្តីបាននិយាយកាលពីថ្ងៃអង្គារថា បំណែកនៃយន្ដហោះ AN-26 ដែលបានបាត់ខ្លួននៅឧបទ្វីប Kamchatka នៅចុងភាគខាងកើតប្រទេសរុស្ស៊ី ត្រូវបានគេរកឃើញនៅជិតព្រលានយន្តហោះ ដែលវាត្រៀមនឹងចុះចត ។

ទន្ទឹមនោះ មិនមានរបាយការណ៍នៃអ្នករស់រានមានជីវិតនោះទេ ខណៈដែលអាជ្ញាធរបានរកឃើញបំណែកនៃយន្តហោះចម្ងាយប្រហែល ៥ គីឡូម៉ែត្រពីអាកាសយានដ្ឋានមួយនៅភូមិ Palana ។

អាជ្ញាធរបាននិយាយថា យន្ដហោះម៉ាស៊ីនភ្លោះដែលដឹកមនុស្ស ២៩ នាក់បានធ្លាក់លើភ្នំ ខណៈដំបូងឡើយ យន្តហោះនេះត្រូវបានគេជឿថាធ្លាក់ចូលទៅក្នុងសមុទ្រ ហើយនាវាត្រូវបានបញ្ជូនទៅកន្លែងនោះដើម្បីស្វែងរក ។

របាយការណ៍ចុងក្រោយបាននិយាយថា យន្ដហោះបានបែកជាពីរផ្នែក ដោយមួយផ្នែកបានធ្លាក់ចូលសមុទ្រ និងមួយផ្សេងទៀតធ្លាក់នៅលើដី ។

ក្រសួងសង្គ្រោះបន្ទាន់របស់ប្រទេសរុស្ស៊ី បាននិយាយថា យន្ដហោះម៉ាស៊ីនភ្លោះប្រភេទ AN-26 កំពុងធ្វើដំណើរចេញពីទីក្រុង Petropavlovsk-Kamchatsky ទៅភូមិ Palana នៅភាគខាងជើងឧបទ្វីប Kamchatka នៅពេលយន្តហោះ បាត់បង់ទំនាក់ទំនងជាមួយអ្នកគ្រប់គ្រងចរាចរណ៍ផ្លូវអាកាស ។

ស្របពេលជាមួយគ្នានោះដែរ ក្រុមអ្នកព្យាករណ៍អាកាសធាតុបានបញ្ជាក់ថា នៅពេលយន្តហោះធ្លាក់ អាកាសធាតុនៅតំបន់នោះមានពពកក្រាស់ ហើយពពកទាំងនោះនៅលើផ្លូវរបស់យន្ដហោះ ក្នុងរយៈកម្ពស់ ៣០០ ទៅ ៦០០ ម៉ែត្រ ។

គួរបញ្ជាក់ថា យន្តហោះប្រភេទ AN-26 ដែលបាត់នោះបានដាក់ដំណើរការប្រើប្រាស់នៅឆ្នាំ ១៩៨២ ហើយគ្រោងនឹងឈប់ដំណើរការពីសេវាកម្មនៅថ្ងៃទី ៣០ ខែសីហា ឆ្នាំ ២០២១ នេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ដឹងព័ត៌មានច្បាស់អំពី យន្តហោះ រុស្ស៊ី ដែលបាត់ខ្លួន