មីយ៉ាន់ម៉ា សម្រេចបិទសាលារៀនជាថ្មី ក្រោយផ្ទុះឆ្លងកូវីដបំប្លែងខ្លួនខ្លាំងពេក

ប្រទេសមីយ៉ាន់ម៉ានឹងបិទសាលារៀនទាំងអស់ជាបណ្តោះអាសន្ន ដោយសារតែការរកឃើញកាន់តែច្រើន នៃករណីឆ្លងវីរុសកូវីដបំប្លែងខ្លួនថ្មីនៅក្នុងប្រទេសអាស៊ីមួយនេះ ។ នេះបើយោងតាមការចេញផ្សាយពីក្រសួងសុខាភិបាល និងកីឡាមីយ៉ាន់ម៉ា កាលពីល្ងាចថ្ងៃព្រហស្បតិ៍ ។

ការបិទគ្រិះស្ថានអប់រំទាំងនោះរួមមាន សាលាឯកជន និងសាលាពុទ្ធសាសនា បន្ទាប់ពីបើកដំណើរការឡើងវិញកាលពីខែមុន ត្រូវបានកំណត់បិទសាជាថ្មី ពោលចាប់ផ្តើមពីថ្ងៃសុក្រនេះទៅ និងបន្តរហូតដល់ថ្ងៃទី ២៣ ខែកក្កដា ។

កាលពីថ្ងៃព្រហស្បតិ៍ ប្រទេសមីយ៉ាន់ម៉ាបានរាយការណ៍ពីករណីឆ្លងថ្មី នៃជំងឺកូវីដ ១៩ ចំនួន ៤,១៣២ ករណី និងមានអ្នកស្លាប់ ៥១ នាក់ ក្នុងរយៈពេល ២៤ ម៉ោង ។

យោងតាមទិន្នន័យខាងលើ នាំឲ្យប្រទេសមីយ៉ាន់ម៉ាមានករណីឆ្លងសរុបឡើងដល់ ១៨០,០៥៥ ករណី និងមានអ្នកស្លាប់រហូតដល់ ៣,៦២១ នាក់ ។

គួរបញ្ជាក់ថា ប្រទេសមីយ៉ាន់ម៉ាបានរកឃើញករណីឆ្លងជំងឺកូវីដ ១៩ លើកដំបូងកាលពីថ្ងៃទី ២៣ ខែមីនា ឆ្នាំមុន ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ លោកស្រី អ៊ុងសាន ស៊ូជី ស្នើប្រជាជនចាក់វ៉ាក់សាំងការពារកូវីដ ទាំងដែលខ្លួនកំពុងជាប់ឃុំ