មីន អ៊ុងឡាំង​ ប្រកាស​​​រៀបចំ​បោះឆ្នោត​​ក្នុងខែ​ធ្នូឆ្នាំនេះ ខណៈ​​​​​ក្រុមប្រឆាំង​ថា «នឹងអុកឡុក»

ប្រមុខរបបយោធា​​នៃ​ប្រទេស​មីយ៉ាន់​ម៉ា​ លោក មីន អ៊ុងឡាំង (Min Aung Hlaing) ដែលកំពុងកាន់អំណាចរបស់ប្រទេសមីយ៉ាន់ម៉ាបានប្រកាសកាលពីថ្ងៃព្រហស្បតិ៍ ទី​២៧ មីនា ថា ខ្លួន​នឹងរៀបចំការបោះឆ្នោតដោយសេរី និងយុត្តិធម៌ក្នុង​ខែធ្នូឆ្នាំនេះ ខណៈដែលលោកបានជំរុញឱ្យគូប្រជែងប្រដាប់អាវុធក្នុងប្រទេសបញ្ឃប់អំពើហិង្សា និងបន្តការសន្ទនាដោយសន្តិវិធី។

ក្នុងអំឡុងពេលសុន្ទរកថានៅឯក្បួនដង្ហែរទិវាកងកម្លាំងប្រដាប់អាវុធប្រចាំឆ្នាំរបស់ប្រទេសមីយ៉ាន់ម៉ា លោក មីន អ៊ុងឡាំង បាន​និយាយថា របប​​យោធាកំពុងស្វែងរកការរៀបចំការបោះឆ្នោតប្រកប​ដោយ​​ដោយ​សេចក្តី​ «ថ្លៃថ្នូរ» ហើយ បានសន្យាផ្ទេរអំណាចទៅឱ្យគណបក្សឈ្នះឆ្នោត។

​ថ្លែ​ងទៅ​កាន់​​ទាហានរាប់រយនាក់ដែល​ប្រមូលផ្តុំនៅទីលានដង្ហែរក្បួនក្នុងរដ្ឋធានី Naypyidaw ​លោក មីន អ៊ុងឡាំង បាន​លើក​ឡើង​​ថា ពួកគេ​ត្រូវតែគាំទ្រការបោះឆ្នោតពហុបក្ស ដោយសេរី និងយុត្តិធម៌។ លោក​បាន​បន្ថែម​ថា​៖«​យើង​នឹង​ផ្ទេរ​អំណាច​ទៅ​ឲ្យ​គណបក្ស​ឈ្នះ​ឆ្នោត។

ទោះបីជាត្រូវបានជាប់គាំងនៅក្នុងសង្គ្រាមស៊ីវិលក៏ដោយ សេដ្ឋកិច្ច​ធ្លាក់ចុះ​ដុន​ដាប​និង​ទ្រុឌទ្រោម និងគណបក្សនយោបាយរាប់សិបត្រូវបានហាមឃាត់ ឬបដិសេធមិនចូលរួម ក៏​របប​​យោធាបានប្តេជ្ញាចិត្តឆ្ពោះទៅមុខជាមួយនឹងការបោះឆ្នោត ដែលអ្នករិះគន់បានចំអកថា ការបោះឆ្នោតនេះជាការបោកប្រាស់ដើម្បីរក្សាតំណែងកាន់អំណាចស្របច្បាប់ប៉ុណ្ណោះ។

ចាប់តាំងពីការផ្តួលរំលំរដ្ឋាភិបាលស៊ីវិលជាប់ឆ្នោតរបស់លោកស្រី អ៊ុងសាន ស៊ូជី ក្នុង​ក្នុង​ខែ​​កុម្ភៈ ឆ្នាំ ២០២១ យោធាបានតស៊ូដើម្បីគ្រប់គ្រងប្រទេស និងទប់ទល់នឹងការបះបោរ។ លោក មីន អ៊ុងឡាំង បាននិយាយថា យោធា​កំពុងប្រយុទ្ធនឹងពួកឧទ្ទាមដែល​ដែល​ក្រុម​មេដឹកនាំ​យោធា​​ចោទ​ថា «ចង់បំផ្លាញប្រទេស» ដោយជំរុញឱ្យពួកគេបោះបង់យុទ្ធនាការប្រដាប់អាវុធ និងបន្តដំណោះស្រាយនយោបាយតាមរយៈការសន្ទនា។

កាលពីដើមខែនេះ លោក មីន អ៊ុងឡាំង បាននិយាយថា ការបោះឆ្នោតនឹងប្រព្រឹត្តទៅនៅខែធ្នូឆ្នាំនេះឬខែមករា ឆ្នាំ ២០២៦ ក្នុងអំឡុងពេលលោកទៅទស្សនកិច្ចនៅប្រទេសបេឡារុស។ របបយោធាក៏បានធ្វើជំរឿនកាលពីឆ្នាំមុន ដែលជាផ្នែកមួយនៃការរៀបចំដើម្បីបង្កើតបញ្ជីបោះឆ្នោត ដែលបានចងក្រងនៅក្នុងសង្កាត់ចំនួន១៤៥ក្នុងចំណោមសង្កាត់ចំនួន ៣៣០​របស់ប្រទេសមីយ៉ាន់ម៉ា។

ការបោះឆ្នោតនេះមានគណបក្សចំនួន៥៣បានចុះឈ្មោះដើម្បីប្រកួតប្រជែង។ ទោះយ៉ាងណា អ្នកប្រឆាំង​​របប​សឹក​មីយ៉ាន់​ម៉ា​ បាននិយាយថា ពួកគេនឹងរំខានដល់ការបោះឆ្នោត ហើយបានស្នើឱ្យប្រទេសផ្សេងទៀតមិនទទួលស្គាល់លទ្ធផលនេះ។

អ្នក​វិភាគ​ខ្លះ​និយាយ​ថា ការ​បោះឆ្នោត​អាច​បង្ក​ឲ្យ​មាន​អំពើ​ហិង្សា​កាន់​តែ​ខ្លាំង ហើយ​ប្រទេស​ជិត​ខាង​របស់​មីយ៉ាន់ម៉ា​ក្នុង​ប្លុក​អាស៊ី​អាគ្នេយ៍​ ហៅ​កាត់​«​អាស៊ាន» ​បាន​ប្រាប់​របប​យោធា​ឲ្យ​ផ្តល់​អាទិភាព​ដល់​សន្តិភាព​ជុំវិញ​ការ​បោះឆ្នោត។

សូមបញ្ជាក់ថា ការប្រយុទ្ធគ្នារវាងរបបយោធានិងពួកឧទ្ទាមប្រឆាំងរបបយោធាបានជម្លៀសប្រជាជនជាង៣លាននាក់នៅក្នុងប្រទេស​មីយ៉ាន់ម៉ា ជាមួយនឹងអសន្តិសុខស្បៀងកាន់​តែ​​​រីករាលដាល និងជាងមួយភាគបីនៃចំនួនប្រជាជនដែលត្រូវការជំនួយមនុស្សធម៌។ នេះបើយោងតាមអង្គការសហប្រជាជាតិ៕

អត្ថបទ៖ ប៊ុន សុភាព