ភ្លៀងធ្លាក់ខ្លាំងនៅ Mumbai បង្កឲ្យមានបំណាក់ដី សម្លាប់មនុស្ស ២៥នាក់

មនុស្សយ៉ាងតិច២៥នាក់ បានស្លាប់ក្នុងតំបន់ចំនួន៣ នៅជាយក្រុង Mumbai នៅពេលផ្ទះជាច្រើនខ្នង ត្រូវបាក់រលំបន្ទាប់ពីមានបំណាក់ដី ដែលបង្កឡើងដោយភ្លៀងធ្លាក់ខ្លាំង។

ក្នុងរយៈពេល ២៤ ម៉ោងចុងក្រោយ អាជ្ញាធរបានរាយការណ៍ថា មានឧប្បត្តិចំនួន១១ ដែលបណ្តាលឲ្យផ្ទះឬជញ្ជាំង ត្រូវបាក់រលំនៅ Mumbai។

លោកនាយករដ្ឋមន្រ្តី Narendra Modi បានចូលរួមរំលែកទុក្ខក្នុងសារលើ Twitter និងប្រកាសផ្តល់ជំនួយដល់ជនរងគ្រោះ។

តំបន់ជាច្រើននៅក្នុងទីក្រុង ត្រូវបានជន់លិចបន្ទាប់ពីមានភ្លៀងធ្លាក់ខ្លាំងក្នុងរយៈពេល ២៤ ម៉ោងចុងក្រោយ ហើយសេវាកម្មរថភ្លើងនៅជាយក្រុង ត្រូវបានរំខានដែលធ្វើឲ្យប៉ះពាល់ដល់មជ្ឈមណ្ឌលហិរញ្ញវត្ថុរបស់ប្រទេសឥណ្ឌាមួយនេះ។

នាយកដ្ឋានឧតុនិយមបាននិយាយកាលពីថ្ងៃអាទិត្យថា ទីក្រុង Mumbai និងឆ្នេរនៃរដ្ឋ Maharashtra របស់ឥណ្ឌា នឹងជួបភ្លៀងធ្លាក់ខ្លាំងទៅ ៗ ក្នុងរយៈពេល ៤ ថ្ងៃខាងមុខ។

ភ្លៀងធ្លាក់ខ្លាំង ជាពិសេសក្នុងអំឡុងរដូវមូសុងខែកក្កដា ដល់ខែកញ្ញា ជាញឹកញាប់ បានបង្កឲ្យមានការដួលរលំអគារជាពិសេសសំណង់ចាស់ៗឬសំណង់ខុសច្បាប់ នៅក្នុងប្រទេស ឥណ្ឌា៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ឥណ្ឌូនេស៊ីមានអ្នកស្លាប់ដោយសារការបាក់ដីថ្មីក្រោយកប់ក្រោមភក់រាប់តោន