រកឃើញមនុស្សស្លាប់ឡើងដល់ជាង ២០០នាក់ ក្នុងសោកនាដកម្មបាក់ដី នៅ អេត្យូពី

តាមការចុះផ្សាយរបស់ Al Jazeera នៅថ្ងៃពុធ​ ទី២៤ ខែកក្កដា​​ ឆ្នាំ២០២៤, មកទល់ពេលនេះ ក្រុមជួយសង្គ្រោះបានរកឃើញមនុស្សស្លាប់ដល់២២៩នាក់ហើយ ក្នុងសោកនាដកម្មបាក់ដីដ៏រន្ធត់នៅក្នុងតំបន់ដាច់ស្រយាល ភាគខាងត្បូងប្រទេសអេត្យូពី ខណៈគេគិតថា តួលេខជនរងគ្រោះនឹងបន្តកើនឡើងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បំណាក់ដីលើកដំបូង ដែលបង្កឡើងដោយភ្លៀងធ្លាក់ខ្លាំង បានវាយប្រហារតំបន់ Gofa កាលពីថ្ងៃចន្ទ ហើយមូលហេតុដែលធ្វើឲ្យតួលេខមនុស្សស្លាប់ហក់ឡើងលឿនបែបនេះ គឺព្រោះតែបំណាក់ដីលើកទីពីរ បានកប់ក្រុមមនុស្សដែលកំពុងចូលរួមក្នុងការជួយសង្គ្រោះអ្នកកប់ដោយសារបំណាក់ដីលើកទីមួយ។

តាមការបញ្ជាក់ពីនាយកដ្ឋានកិច្ចការទំនាក់ទំនងក្នុងតំបន់, ក្នុងចំណោមអ្នកស្លាប់ មាន១៤៨នាក់ជាមនុស្សប្រុស និង៨១នាក់គឺជាមនុស្សស្រី ហើយអ្វីដែលធ្វើឲ្យគេកាន់តែសង្វេគគឺថា មនុស្សស្លាប់ក៏រួមមានទាំងស្រ្តីពោះធំ និងកុមារផងដែរ។

សូមជម្រាបថា តំបន់ភាគខាងត្បូងប្រទេសនេះ ក៏ធ្លាប់កើតមានគ្រោះធម្មជាតិបំណាក់ដីពីមុនមកដែរ ពោលគឺក្នុងឆ្នាំ២០១៨ ដោយសម្លាប់មនុស្សចំនួន៣២នាក់។

បច្ចុប្បន្ន អេត្យូពី មិនមែនរងគ្រោះត្រឹមការបាក់ដីប៉ុណ្ណោះទេ ជាក់ស្តែងប្រទេសនេះ ក៏ត្រូវវាយប្រហារដោយទឹកជំនន់ ហើយសូម្បីតែប៉ែកផ្សេងទៀតនៃប្រទេសនេះ ក៏កំពុងប្រឈមនឹងគ្រោះរាំងស្ងួតធ្ងន់ធ្ងរផងដែរ ហើយអង្គការសហប្រជាជាតិរាយការណ៍ថា មនុស្សរាប់លាននាក់នៅក្នុងប្រទេសអេត្យូពី កំពុងប្រឈមនឹងកង្វះអាហារូបត្ថម្ភ ដោយសារតែបញ្ហាទាក់ទងនឹងអាកាសធាតុ៕

អត្ថបទ៖ សុខ សុវណ្ណ

ចុចអាន៖ មនុស្ស១៤៦នាក់ កប់ស្លាប់ក្រោមបំណាក់ដីភក់ នៅប្រទេស អេត្យូពី