មនុស្ស១៤៦នាក់ កប់ស្លាប់ក្រោមបំណាក់ដីភក់ នៅប្រទេស អេត្យូពី

តាមការបញ្ជាក់ពីអាជ្ញាធរមូលដ្ឋានប្រាប់ទៅ AP នៅថ្ងៃអង្គារទី២៣ ខែកក្កដា ឆ្នាំ២០២៤, តួលេខមនុស្សស្លាប់ក្នុងហេតុការណ៍បាក់ដីភក់ដ៏រន្ធត់ នៅតំបន់ដាច់ស្រយាលនៃប្រទេសអេត្យូពី បានកើនឡើងដល់ ១៤៦នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលស្រុក Kencho Shacha Gozdi និយាយថា បំណាក់ដីនេះ កើតឡើងក្រោយពេលមានភ្លៀងធ្លាក់ខ្លាំងដូចហែកមេឃ ហើយអ្វីដែលកាន់តែសង្វេគគឺថា ក្នុងចំណោមអ្នកស្លាប់ ក៏មានស្រ្តីពោះធំនិងកុមារផងដែរ។

តាមពិតទៅ តួលេខមនុស្សស្លាប់គិតត្រឹមល្ងាចថ្ងៃចន្ទ មានត្រឹម៥៥នាក់ប៉ុណ្ណោះ ប៉ុន្តែក្រោយមក ក្រុមជួយសង្គ្រោះ បានរកឃើញសាកសពជាបន្តបន្ទាប់ ក្នុងចំនួនគួរឲ្យភ្ញាក់ផ្អើលជាទីបំផុត។

ទោះបីជាយ៉ាងណាក៏ដោយ ក៏មានមនុស្សចំនួន៥នាក់ ត្រូវបានគេជួយសង្គ្រោះចេញពីដីភក់ ទាំងនៅរស់រានមានជីវិតផងដែរ។

មកទល់ពេលនេះ អាជ្ញាធរមូលដ្ឋានកំពុងតាមដានស្ថានការណ៍ ហើយចេញការព្រមានអំពីលទ្ធភាពនៃបំណាក់ដីបន្ថែមទៀត ខណៈក្រុមជួយសង្គ្រោះ កំពុងបន្តស្វែងរកជនរងគ្រោះជាបន្ត។

សូមបញ្ជាក់ថា បំណាក់ដីមិនមែនជារឿងចម្លែកឡើយ ក្នុងរដូវភ្លៀងនៅប្រទេសអេត្យូពី ដែលចាប់ផ្តើមពីខែកក្កដា រហូតដល់ពាក់កណ្តាលខែកញ្ញា៕

អត្ថបទ៖ សុខ សុវណ្ណ

ចុចអាន៖ តួលេខមនុស្សកប់ទាំងរស់ ក្រោមបំណាក់ដីនៅ ប៉ាពូអាស៊ីនូវែលហ្គីណេ ឡើងដល់ជាង ២ ០០០នាក់