ធ្ងន់ធ្ងរ! ថៃ មានអ្នកស្លាប់និងឆ្លងកូវីដ សុទ្ធតែក្នុងកម្រិត បំបែកកំណត់ត្រាថ្មី

ក្រសួងសុខាភិបាល បានរាយការណ៍នៅព្រឹកថ្ងៃព្រហស្បតិ៍នេះថា ក្នុងរយៈពេល២៤ម៉ោងចុងក្រោយ ប្រទេសថៃ មានអ្នកស្លាប់ដោយសារជំងឺកូវីដ-១៩ ក្នុងចំនួនខ្ពស់បំផុតបំបែកកំណត់ត្រាថ្មី១៦៥នាក់ និងឆ្លងថ្មីច្រើនបំផុត ១៧,៦៦៩ករណី។

ក្នុងចំណោមការឆ្លងថ្មី មាន ១៧,៤០៨ករណីជាប្រជាជនទូទៅនិង ២៦១ ករណីជាអ្នកទោសក្នុងពន្ធនាគារ។

ចាប់តាំងពីថ្ងៃទី១ខែមេសាមក នៅពេលកូវីដរលកទី៣ផ្ទុះឡើង មានអ្នកជំងឺកូវីដចំនួន ៥៣២,១៦៧នាក់ ក្នុងនោះមាន ៣៥២,៨៦៤នាក់បានជាសះស្បើយ។

ចាប់តាំងពីជំងឺរាតត្បាតផ្ទុះឡើងកាលពីដើមឆ្នាំមុនមក មានការឆ្លងសរុប ៥៦១,០៣០ករណី ក្នុងនោះមាន ៣៧០,៤៩២នាក់ បានជាសះស្បើយ។

ចំណែកចំនួនអ្នកស្លាប់ក្នុងរលកទី៣គឺមាន ៤,៤៦៨នាក់ ធ្វើឲ្យការស្លាប់សរុបចាប់តាំងពីរោគរាតត្បាតផ្ទុះឡើងកាលពីដើមឆ្នាំមុនមក កើនដល់ ៤,៥៦២នាក់។

គួរបញ្ជាក់ថា កំណត់ត្រាចាស់ នៃការឆ្លងកូវីដប្រចាំថ្ងៃ ខ្ពស់បំផុតរបស់ថៃ គឺចំនួន ១៦,៥៣៣ករណី កាលពីថ្ងៃពុធចំណែកកំណត់ត្រាចាស់ នៃអ្នកស្លាប់ច្រើនបំផុតគឺ ១៤១នាក់ កាលពីថ្ងៃទី១៧ខែកក្កដា៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ បំបែកកំណត់ត្រា! ថៃ មានអ្នកឆ្លងកូវីដច្រើនបំផុត និងស្លាប់ថ្មី ១៣៣នាក់