អាមេរិក ប្រកាសរកឃើញអ្នកឆ្លងកូវីដថ្មី ខ្ពស់បំផុតចាប់តាំងពីខែកុម្ភៈ

សហរដ្ឋអាមេរិក បានប្រកាសមានអ្នកឆ្លងកូវីដប្រចាំថ្ងៃជាង ១០០,០០០ករណីកាលពីថ្ងៃសុក្រ (ថ្ងៃសៅរ៍នៅកម្ពុជា) ដែលនេះជាកំណត់ត្រាខ្ពស់បំផុត ចាប់តាំងពីដើមខែកុម្ភៈឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យដែលធ្វើបច្ចុប្បន្នភាពកាលពីថ្ងៃសៅរ៍ ដោយមជ្ឈមណ្ឌលត្រួតពិនិត្យនិងបង្ការជំងឺអាមេរិក (CDC) បានបង្ហាញថា មានករណីថ្មីចំនួន ១០១,១៧១ ករណីនៅទូទាំងប្រទេស។

តួលេខថ្មីនេះ បាននាំឲ្យករណីថ្មីជាមធ្យមប្រចាំសប្តាហ៍កើនដល់ ៧២,៤៩៣ករណី ដែលជាចំនួនខ្ពស់បំផុតចាប់តាំងពីពាក់កណ្តាលខែកុម្ភៈមក។

ករណីឆ្លងកូវីដ ការចូលព្យាបាលក្នុងមន្ទីរពេទ្យនិងការស្លាប់ កំពុងកើនឡើងជាថ្មីម្តងទៀតនៅស្ទើរតែគ្រប់រដ្ឋរបស់សហរដ្ឋអាមេរិក ដែលជំរុញដោយវីរុសបំប្លែងខ្លួនឆ្លងខ្លាំង Delta។

យោងតាមរបាយការណ៍ប្រចាំសប្តាហ៍របស់ CDC បានឲ្យដឹងថា ការឆ្លងថ្មីជាមធ្យមប្រចាំសប្តាហ៍បានកើនឡើង ៦៤,១ ភាគរយ បើប្រៀបធៀបទៅនឹងទិន្នន័យ ៧ ថ្ងៃមុននេះ។

ស្របពេលជាមួយគ្នានោះ ករណីចូលព្យាបាលក្នុងមន្ទីរពេទ្យជាមធ្យមប្រចាំសប្តាហ៍ ក៏បានកើនឡើង៤៦,៣ភាគរយផងដែរ បើប្រៀបធៀបនឹងសប្តាហ៍មុននោះ។

ចំណែកការស្លាប់ថ្មីជាមធ្យម បានកើនឡើង ៣៣,៣ ភាគរយ បើធៀបនឹងសប្តាហ៍មុន៕

ប្រែសម្រួល៖ Vann Vann

ប្រភព៖ Xinhua

ចុចអាន៖ Delta វាយលុកខ្លាំង លោក បៃដិន ប្រាប់ រដ្ឋ ឲ្យ ផ្តល់ប្រាក់ ១០០ ដុល្លារ ដល់ អ្នក ចាក់ វ៉ាក់សាំងថ្មី