ក្រោយចប់អូឡាំពិក ជប៉ុន កំពុងស្ថិតក្នុងស្ថានភាពកម្រិតមហន្តរាយ ដោយសារកូវីដ

ប្រទេសជប៉ុនកាលពីថ្ងៃសុក្របានរាយការណ៍ពីចំនួនករណីឆ្លងខ្ពស់បំផុត ចាប់តាំងពីការផ្ទុះឡើងនៃជំងឺកូវីដ ១៩ ខណៈអ្នកជំនាញសុខាភិបាលបានព្រមានថា ប្រទេសនេះស្ថិតនៅក្នុង “ស្ថានភាពកម្រិតមហន្តរាយ” ។

យោងតាមទិន្នន័យរបស់រដ្ឋាភិបាលបានឲ្យដឹងថា ប្រទេសនេះបានរាយការណ៍ពីករណីឆ្លងកូវីដថ្មីជាង ២ ម៉ឺនករណីជាលើកដំបូងកាលពីថ្ងៃសុក្រ ចាប់តាំងពីការរីករាលដាលនៃជំងឺរាតត្បាត ។

លោក Ozaki Haruo ប្រធានសមាគមវេជ្ជសាស្ត្រទីក្រុងតូក្យូ បាននិយាយថា “ឥឡូវនេះជប៉ុនស្ថិតក្នុងស្ថានភាពកម្រិតគ្រោះមហន្តរាយ ។ យើងលែងស្ថិតក្នុងដំណាក់កាល ដែលគេគិតថាជំងឺនេះប៉ះពាល់តែអ្នកដែលចេញទៅក្រៅពេលយប់ទៀតហើយ” ។

របាយការណ៍បាននិយាយថា ទីក្រុងតូក្យូបានរាយការណ៍ពីការឆ្លងជាង ៥,៧០០ ករណី ដែលជាចំនួនករណីឆ្លងខ្ពស់បំផុតមិនធ្លាប់មាននៅក្នុងរដ្ឋធានី ។ ដូចគ្នានេះផងដែរ ចំនួនអ្នកជំងឺធ្ងន់ធ្ងរនៅក្នុងរដ្ឋធានីបានកើនឡើងដល់ ២២៧ នាក់ ដោយដាក់សម្ពាធបន្ថែមលើប្រព័ន្ធថែទាំសុខភាព ។

ការកើនឡើងនៃការឆ្លងមេរោគនេះកើតឡើង ស្របពេលជាមួយនឹងការបញ្ចប់ការប្រកួតកីឡាអូឡាំពិកទីក្រុងតូក្យូកាលពីសប្តាហ៍មុន ។

ចំពេលមានការព្រួយបារម្ភអំពីករណីកើនឡើងនេះ អាជ្ញាធរមូលដ្ឋាននៅទីក្រុងតូក្យូបានជំរុញឲ្យប្រជាជន កុំធ្វើដំណើរទៅខេត្តផ្សេងទៀត និងនៅផ្ទះឲ្យបានច្រើនតាមដែលអាចធ្វើទៅបាន ។

អភិបាលក្រុងតូក្យូលោកស្រី Koike Yuriko បាននិយាយថា “ឥឡូវនេះយើងកំពុងប្រឈមមុខនឹងវិបត្តិធំបំផុត ចាប់តាំងពីជំងឺរាតត្បាតបានចាប់ផ្តើម ហើយវាជាគ្រោះមហន្តរាយ ។ យើងចង់សុំឲ្យអ្នករាល់គ្នាធ្វើសកម្មភាព ដើម្បីការពារជីវិតផ្ទាល់ខ្លួនរបស់អ្នក” ។

ទន្ទឹមន ប្រទេសជប៉ុនក៏បានរាយការណ៍ពីករណីឆ្លងវីរុសបំប្លែងខ្លួន Lambda លើស្ត្រីម្នាក់ក្នុងវ័យ ៣០ ឆ្នាំដែលជាប់ពាក់ព័ន្ធនឹងកីឡាអូឡាំពិកតូក្យូ ។ នាងបានធ្វើដំណើរទៅប្រទេសប៉េរូ ជាកន្លែងដែលវីរុសបំប្លែងខ្លួនមួយនេះត្រូវបានគេមើលឃើញ ខណៈវាមានសមត្ថភាពអាចឆ្លងរហ័ស និងមានភាពធន់នឹងវ៉ាក់សាំង ។

គួរបញ្ជាក់ថា គិតត្រឹមពេលនេះ ប្ររទេសជប៉ុនបានកត់ត្រាករណីឆ្លងជំងឺកូវីដ ១៩ ជាង ១ លានករណី និងមានអ្នកស្លាប់ ១៥,៣៥៨ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ជាក្ដីសង្ឃឹមរបស់ពិភពលោក! ជប៉ុន រកឃើញថ្នាំកូវីដលេបមួយថ្ងៃមួយគ្រាប់ អាចព្យាបាលមិនដល់ ១ សប្ដាហ៍