វៀតណាម ចាប់បានក្រុមផលិតថ្នាំ ព្យាបាលកូវីដ ក្លែងក្លាយ

ប៉ូលិសទីក្រុងហូជីមិញ បានចាប់ខ្លួនបុរសម្នាក់និងសួរចម្លើយមនុស្សជាច្រើននាក់ទៀត បន្ទាប់ពីបង្ក្រាបក្រុមមួយ ដែលផលិតថ្នាំក្លែងក្លាយ រួមទាំងថ្នាំដែលប្រើប្រាស់សម្រាប់ព្យាបាលអ្នកជំងឺកូវីដ-១៩ផងដែរ។

មន្រ្តីប៉ូលិស បានឃាត់ខ្លួនលោក Nguyen Duc Thuan អាយុ ៤៦ ឆ្នាំជាមេក្រុម មកពីខេត្ត Ba Ria-Vung Tau ហើយបានសាកសួរមនុស្សចំនួន ៨ នាក់ផ្សេងទៀត ដែលជាប់ពាក់ព័ន្ធក្នុងករណីនេះ។

កាលពីថ្ងៃសុក្រ ប៉ូលិសបានបញ្ឈប់លោក Thuan ដើម្បីធ្វើការត្រួតពិនិត្យ ខណៈពេលដែលគាត់កំពុងជិះម៉ូតូដឹកកេសមួយ តាមដងផ្លូវក្នុងស្រុក Phu Nhuan ដោយមន្ត្រីមើលឃើញថា គួរឲ្យសង្ស័យ។

ពេលឆែកឆេរកេសនោះ ប៉ូលិសបានរកឃើញថ្នាំ Terpin-Codein ចំនួន ១៥០ ប្រអប់ ដែលជាប្រភេទថ្នាំប្រើសម្រាប់បន្ថយរោគសញ្ញារបស់អ្នកជំងឺកូវីដ -១៩ នៅវៀតណាម។

បន្ទាប់មកឈ្មោះ Thuan បានសារភាពថា ក្រុមរបស់ខ្លួន ពិតជាបានក្លែងបន្លំថ្នាំ ដើម្បីលក់រកប្រាក់ចំណេញដោយខុសច្បាប់មែន។

ក្នុងអំឡុងពេលនៃការឆែកឆេរបន្ទាន់ នៅទីតាំងចំនួនបី ក្នុងស្រុក Phu Nhuan និងស្រុកពីរទៀត មន្រ្តីប៉ូលិស បានរឹបអូសវត្ថុធាតុដើមសម្រាប់ផលិតថ្នាំក្លែងក្លាយ និងឧបករណ៍ជាច្រើនទៀត។

ក្រុមអ្នកស៊ើបអង្កេតបាននិយាយថា សរុបនៃការរឹបអូសបាន មានតម្លៃរាប់ម៉ឺនដុល្លារអាមេរិក៕

ប្រែសម្រួល៖ Vann Vann

ប្រភព៖ Tuoi Tre