ក្រោយប្រកាសរដ្ឋាភិបាលថ្មីសុទ្ធតែបុរស ពេលនេះ តាលីបង់ បង្ហើបតម្រុយរួមបញ្ចូលស្រ្តីក្នុងមុខតំណែងណាមួយ

អ្នកនាំពាក្យក្រុមតាលីបង់លោក Zabihullah Mujahid បាននិយាយថា រដ្ឋាភិបាលអាហ្វហ្គានីស្ថាននឹងរួមបញ្ចូលស្ត្រីក្នុងតំណែងណាមួយនាពេលអនាគត ខណៈកាលពីថ្ងៃអង្គារក្រុមតាលីបង់បានប្រកាសរដ្ឋាភិបាលបណ្តោះអាសន្នរបស់អាហ្វហ្គានីស្ថាន ដែលមិនមានរដ្ឋមន្ត្រីជាស្ត្រីឡើយ ។

លោក Mujahid បានប្រាប់ទូរទស្សន៍ BFMTV កាលពីល្ងាចថ្ងៃពុធថា “រដ្ឋាភិបាលនេះគឺបណ្តោះអាសន្នប៉ុណ្ណោះ ។ យើងនឹងមានតំណែងសម្រាប់ស្ត្រីដោយគោរពតាមច្បាប់ Sharia ។ នេះគឺជាការចាប់ផ្តើម ប៉ុន្តែយើងនឹងរកឃើញតំណែងសម្រាប់ស្ត្រី ។ ពួកគេអាចជាផ្នែកមួយនៃរដ្ឋាភិបាល ហើយវាអាចនឹងកើតឡើងនៅដំណាក់កាលទី ២” ។

កាលពីថ្ងៃពុធប្រជាពលរដ្ឋនៅទីក្រុងកាប៊ុលបានទៅធ្វើបាតុកម្មនៅតំបន់ Dashte Barchi ភាគខាងលិចទីក្រុងកាប៊ុល ដោយទាមទារឲ្យមានការធានាពីការចូលរួមរបស់ស្ត្រីក្នុងការគ្រប់គ្រងប្រទេស ។ ប្រភពមួយបានប្រាប់សារព័ត៌មាន Sputnik ថា ក្នុងពេលជាមួយគ្នានេះដែរ ស្ត្រីក៏បានប្រមូលផ្តុំគ្នានៅទីក្រុង Kunduz ដើម្បីគាំទ្រដល់រដ្ឋាភិបាលបណ្តោះអាសន្នរបស់អាហ្វហ្គានីស្ថានផងដែរ ។

ទន្ទឹមនោះ អង្គការ UN Women បាននិយាយកាលពីថ្ងៃពុធថា ខ្លួនមានការខកចិត្តយ៉ាងខ្លាំងចំពោះសមាសភាពរបស់រដ្ឋាភិបាលអាហ្វហ្កានីស្ថានថ្មីដោយមិនរាប់បញ្ចូលស្ត្រីក្នុងមុខតំណែងណាមួយ ។ ក្រុមនេះបានបន្ថែមថា ខ្លួនបានទទួលរបាយការណ៍ជាច្រើន អំពីស្ត្រីដែលត្រូវបានហាមឃាត់មិនឲ្យចាកចេញពីផ្ទះរបស់ពួកគេ ដើម្បីទៅធ្វើការ ឬដើម្បីបំពេញភារកិច្ចប្រចាំថ្ងៃ ។

កន្លងមកមេដឹកនាំតាលីបង់លោក Hibatullah Akhundzada បាននិយាយថា អាហ្វហ្គានីស្ថាននឹងត្រូវគ្រប់គ្រងដោយច្បាប់ Sharia ហើយលោកបានបន្ថែមថា សិទ្ធិមនុស្ស និងជនជាតិភាគតិចនឹងត្រូវបានការពារនៅក្នុងក្របខ័ណ្ឌនៃសាសនាឥស្លាម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ តាលីបង់ បង្ខាំងស្រីៗនៅក្រោមដី ដើម្បីរារាំងមិនឲ្យចេញធ្វើបាតុកម្ម (មានវីដេអូ)