ស្ត្រីវៀតណាម ធ្វើបាបកូនចុងដល់ស្លាប់ ប្រឈមការចោទប្រកាន់ បទល្មើសព្រហ្មទណ្ឌ

ស្ត្រីវៀតណាមដែលធ្វើបាបកូនចុងរហូតដល់ស្លាប់ ត្រូវប្រឈមមុខនឹងការចោទប្រកាន់ បទល្មើសព្រហ្មទណ្ឌ។

ប៉ូលិសសង្កត់ Binh Thanh បាននិយាយកាលពីថ្ងៃអង្គារថា នាង Nguyen Vo Quynh Trang អាយុ ២៦ ឆ្នាំ ត្រូវបានចោទប្រកាន់ថាបានវាយដំ និងធ្វើទារុណកម្មកូនស្រីចុង អាយុប្រាំបីឆ្នាំ រហូតដល់ស្លាប់។ នាង​ត្រូវ​បាន​ឃុំ​ខ្លួន​​រយៈ​ពេល​ពីរ​ខែសិន ​ដើម្បី​ស៊ើប​អង្កេត​ពី​បទ​រំលោភ​បំពាននេះ។

Trang រស់នៅជាមួយបុរសជាគូកំណាន់ និងកូនស្រីរបស់គាត់នៅអគារផ្ទះល្វែងមួយក្នុងសង្កាត់ Binh Thanh។ ជារឿយៗ នាងបានបង្ខំក្មេងស្រីតូច ធ្វើការងារ ហើយវាយដំ។

កាល​ពី​ថ្ងៃ​ទី​២២ ខែ​ធ្នូ Trang បាន​វាយ​ក្មេង​ស្រី​រហូត​ដល់​សន្លប់។ ក្មេង​ស្រី​រង​គ្រោះ​ត្រូវ​បាន​បញ្ជូន​ទៅ​កាន់​មន្ទីរពេទ្យ​ជា​បន្ទាន់ ប៉ុន្តែ​ត្រូវ​បាន​គេ​ប្រកាស​ថា​ស្លាប់​មុន​ពេលទៅ​ដល់ ។

ប៉ូលិសនិយាយថា មានស្នាមជាំជាច្រើននៅពេញដងខ្លួនក្មេងស្រីតូចនោះ រួមមានទាំងរបួសដែលជាសះស្បើយរួចហើយផងដែរ ដែលនេះបង្ហាញថា នាងត្រូវបានគេវាយពីមុនមក។

នៅ​ក្នុង​ផ្ទះល្វែង ប៉ូលិស​បាន​រក​ឃើញ​អម្បោស​បាក់ និង​វត្ថុ​មួយ​ចំនួន​ដែល​បង្ហាញ​ថា ក្មេង​ស្រី​រង​គ្រោះ​ត្រូវ​បាន​គេ​វាយ​និង​បង្ខំ​ឲ្យ​ធ្វើ​ការ​ងារ។ អ្នកជិតខាង​ក៏​បាន​និយាយ​ដែរ​ថា ពួកគេ​តែងតែ​ឮ​ក្មេងស្រី​តូច​យំ​។

គួរបញ្ជាក់ថា កុមារដែលទទួលទណ្ឌកម្មពីសមាជិកគ្រួសារ គឺជារឿងតែងតែកើតឡើងនៅក្នុងប្រទេសវៀតណាម។ យោងតាមការស្ទង់មតិរបស់អង្គការយូនីសេហ្វ កុមារជាង ៦៨ ភាគរយ ដែលមានអាយុពី១ឆ្នាំដល់១៤ឆ្នាំនៅក្នុងប្រទេសវៀតណាម គឺជាជនរងគ្រោះនៃអំពើហិង្សាក្នុងគ្រួសារ ដែលប្រព្រឹត្តដោយឪពុកម្តាយ ឬអ្នកមើលថែរបស់ពួកគេ៕

ប្រែសម្រួល៖ Vann Vann

ប្រភព៖ VN Express

ចុចអាន៖ ចម្លើយសារភាពច្បាស់ៗរបស់ម្តាយចុង ធ្វើទារុណកម្មក្មេងស្រីវៀតណាម ដល់ស្លាប់