ក្រុម ISIS ចាប់ផ្តើមជ្រើសរើស មេដឹកនាំថ្មី

ក្រុម ISIS ចាប់ផ្តើមជ្រើសរើសមេដឹកនាំថ្មីរបស់ខ្លួន ចេញពីរង្វង់ជិតស្និទ្ធនៃក្រុមជីហាដអ៊ីរ៉ាក់ បន្ទាប់ពីការស្លាប់របស់លោក Abu Ibrahim al-Hashimi al-Qurayshi អំឡុងការវាយឆ្មក់ដោយកងកម្លាំងពិសេសរបស់សហរដ្ឋអាមេរិកកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីសន្តិសុខ និងអ្នកវិភាគឯករាជ្យជឿថា មានបេក្ខជនឈានមុខចំនួនបួននាក់ ដែលគេនឹងរើសមួយមកដឹកនាំក្រុមភេរវករនេះ រួមទាំងជនជ្រុលនិយមម្នាក់ដែលត្រូវបានប្រកាសថា ស្លាប់ដោយសេតវិមានកាលពីឆ្នាំមុនផងដែរ។

ការស្លាប់របស់ Qurayshi អាយុ៤៥ឆ្នាំ គឺជាបញ្ហាដ៏ធំមួយទៀតចំពោះក្រុម ISIS, ពីរឆ្នាំបន្ទាប់ពីក្រុមមូស្លីម Sunni មួយនេះ បានបាត់បង់មេដឹកនាំយូរអង្វែងឈ្មោះ Abu Bakr al-Baghdadi ក្នុងការវាយឆ្មក់ស្រដៀងគ្នា។

លោក Qurayshi ដែលមានងារថា “The Professor” និងក្បាលរបស់គាត់មានតម្លៃ១០លានដុល្លារអាមេរិក បានបំផ្ទុះគ្រាប់បែកអត្តឃាតដោយសម្លាប់ខ្លួន ក៏ដូចជាសមាជិកគ្រួសារផងដែរ បន្ទាប់ពីកងកម្លាំងអាមេរិកវាយលុកចូលជំរំស៊ីរីភាគខាងជើងរបស់គាត់។

លោក Fadhil Abu Rgheef អ្នកជំនាញអ៊ីរ៉ាក់ដែលផ្តល់ដំបូន្មានដល់សេវាកម្មសន្តិសុខ បាននិយាយថា យ៉ាងតិចមានអ្នកស្នងតំណែងដ៏មានឥទ្ធិពល​ ចំនួនបួននាក់។

ទាំងនេះរួមមាន លោក Abu Khadija ដែលមានតួនាទីចុងក្រោយជាមេដឹកនាំអ៊ីរ៉ាក់សម្រាប់ក្រុមរដ្ឋឥស្លាម, លោក Abu Muslim មេដឹកនាំក្រុម ISIS ប្រចាំខេត្ត Anbar និងម្នាក់ទៀតឈ្មោះ Abu Salih ដែលគេដឹងព័ត៌មានតិចតួចបំផុតអំពីគាត់ ប៉ុន្តែគេស្គាល់ថាជាអ្នកដែលជិតស្និទ្ធនឹងលោក Baghdadi និង Qurayshi។

ក៏មានលោក Abu Yasser al-Issawi ដែលគេសង្ស័យថានៅមានជីវិតផងដែរ។ គាត់ជាមនុស្សសំខាន់បំផុតសម្រាប់ក្រុម ដោយសារតែគាត់មានបទពិសោធន៍យោធាយូរមកហើយ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អាមេរិក វាយឆ្មក់ ឈានដល់ការសម្លាប់មេក្រុម ISIS នៅ ស៊ីរី