អាមេរិក ចាប់បាន ISIS មួយក្រុម ឆ្លងដែនចូលមកតាមប្រទេស ម៉ិកស៊ិក

តាមការចុះផ្សាយរបស់ USA Today នៅថ្ងៃពុធទី១២ខែមិថុនា, ក្នុងរយៈពេលប៉ុន្មានថ្ងៃចុងក្រោយនេះ នាយកដ្ឋានគយនិងអន្តោប្រវេសន៍អាមេរិក (ICE) សហការជាមួយក្រុមការងារភេរវកម្មរបស់ FBI បានចាប់ខ្លួនជនបរទេសមានទំនាក់ទំនងជាមួយក្រុម ISIS ចំនួន៨នាក់។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកទាំង៨សុទ្ធសឹងមានសញ្ជាតិតាហ្ស៊ីគីស្ថាន ហើយបានឆ្លងចូលសហរដ្ឋអាមេរិក តាមព្រំដែនភាគខាងត្បូងជាប់ប្រទេសម៉ិកស៊ិក ខណៈបច្ចុប្បន្ន ពួកគេកំពុងជាប់ឃុំនៅក្នុងទីក្រុង New York, Los Angeles និង Philadelphia។ 

ស្របពេលជាមួយគ្នានោះដែរ ក្រសួងសន្តិសុខមាតុភូមិ និង FBI បានចេញសេចក្តីថ្លែងការណ៍រួមថា “សហរដ្ឋអាមេរិកកំពុងស្ថិតក្នុងបរិយាកាសគំរាមកំហែងកាន់តែខ្លាំង។ FBI និងក្រសួងសន្តិសុខមាតុភូមិ នឹងបន្តធ្វើការគ្រប់ពេល ជាមួយដៃគូដើម្បីកំណត់ ស៊ើបអង្កេត និងបង្អាក់ដល់ការគំរាមកំហែងដែលអាចកើតមានចំពោះសន្តិសុខជាតិ”។

ដំបូងឡើយ ពេលពិនិត្យនៅព្រំដែន មន្ត្រីអាមេរិកមិនបានរកឃើញព័ត៌មានលម្អិតណាមួយពាក់ព័ន្ធជាមួយពួកគេឡើយ លុះដល់ក្រោយមក ទើបគេស៊ើបដឹងថា ពួកគេពិតជាមានទំនាក់ទំនងជាមួយក្រុម ISIS មែន។ យ៉ាងណា អ្នកទាំង៨ មិនប្រឈមការចោទប្រកាន់ពីបទ ភេរវកម្មឡើយ។

រឿងនេះធ្វើឲ្យគេនឹកឃើញដល់ខែមេសា ដែលកាលនោះ នាយក FBI លោក Christopher Wray បានព្រមានអំពីលទ្ធភាពនៃការវាយប្រហារបណ្តាក់គ្នា ដោយភេរវករនៅសហរដ្ឋអាមេរិក បន្ទាប់ពីការវាយប្រហាររបស់ក្រុម ISIS-K ថ្ងៃទី២២ខែមីនា ក្នុងសាលប្រគំតន្ត្រី Crocus នៅរុស្ស៊ី ដែលសម្លាប់មនុស្ស ១៤៥នាក់ ហើយមកដល់ថ្ងៃពុធទី៥ខែមិថុនា លោក Wray ក៏បានព្រមានដដែលថា សហរដ្ឋអាមេរិក ​កំពុងប្រឈមមុខកាន់តែខ្លាំងឡើងៗហើយ ចំពោះការគំរាមកំហែងវាយប្រហារបែបនោះ។

លោកអះអាងថា ការ​គំរាម​កំហែង​ភេរវកម្ម​នៅ​អាមេរិក​ បាន​កើន​ឡើងយ៉ាងគំហុក​ចាប់​តាំង​ពី​សង្រ្គាម​អ៊ីស្រាអែល-​ហាម៉ាស ឆាបឆេះ​កាល​ពី​ខែ​តុលា​ឆ្នាំមុន ហើយមាន​ក្រុម​ភេរវករ​ក្លែងក្លាយ​ នាំគ្នា​អំពាវនាវ​ឲ្យ​មាន​ការ​វាយ​ប្រហារ​លើ​អាមេរិកនិង​សម្ព័ន្ធមិត្ត​។

នៅអាមេរិក ឧក្រិដ្ឋកម្មស្អប់ខ្ពើមមានការកើនឡើង៦០% ជាពិសេសការវាយប្រហារលើប្រជាជនជ្វីហ្វ ចាប់តាំងពីសង្រ្គាមអ៊ីស្រាអែល-ហាម៉ាស។ បក្សពួកទាំងឡាយ កំពុងបំផុសគំនិត កេងចំណេញពីព្រឹត្តិការណ៍នៅមជ្ឈិមបូព៌ា ដើម្បីប្រកូកប្រកាសឲ្យមានការវាយប្រហារនៅអាមេរិក។ លើសពីនេះ ឥឡូវមានក្តីបារម្ភកាន់តែខ្លាំង ពីសក្តានុពលនៃអំពើភេរវកម្មបណ្តាក់គ្នានៅអាមេរិក ដែលមានសណ្ឋានដូចការវាយប្រហាររបស់ក្រុម ISIS-K នៅរុស្ស៊ី អ៊ីចឹងដែរ៕

អត្ថបទ៖ សុខ សុវណ្ណ

ចុចអាន៖ FBI ព្រមានថា អាមេរិក កំពុងប្រឈមនឹងអំពើភេរវកម្ម ដូចការវាយប្រហារនៅ រុស្ស៊ី