ពេជ្ឈឃាដក្រុម ISIS បាត់ខ្លួនយ៉ាងអាថ៌កំបាំង ពីពន្ធនាគារអាមេរិក

សមាជិកម្នាក់ក្នុងចំណោមសមាជិកក្រុម ISIS Beatle ដែលកំពុងមានទោសជាប់ពន្ធនាគារពេញមួយជីវិត ដោយសារការធ្វើទារុណកម្ម និងសម្លាប់ចំណាប់ខ្មាំងជនជាតិអាមេរិក បានបាត់ខ្លួនយ៉ាងអាថ៌កំបាំងពីប្រព័ន្ធពន្ធនាគាររបស់សហរដ្ឋអាមេរិក ជាហេតុបង្កឲ្យមានកំហឹងពុះកញ្ជ្រោល និងការជជែកបែកផ្សែងក្នុងចំណោមសមាជិកគ្រួសារនៃជនរងគ្រោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Alexanda Kotey អាយុ៣៩ឆ្នាំលែងជាប់ឃុំឃាំងនៅពន្ធនាគារសុវត្ថិភាពខ្ពស់ Canaan ក្នុងរដ្ឋ Pennsylvania ទៀតហើយ។ នេះបើយោងតាមការលាតត្រដាងពីការិយាល័យពន្ធនាគារសហព័ន្ធ។

បុរសមានដើមកំណើតក្នុងទីក្រុងឡុងដ៍រូបនេះ ត្រូវបានចាប់ដាក់ពន្ធនាគារនៅសហរដ្ឋអាមេរិកកាលពីឆ្នាំមុន បន្ទាប់ពីសារភាពកំហុសក្នុងឆ្នាំ២០២១ ចំពោះការចោទប្រកាន់ចំនួន៨ករណីទាក់ទងនឹងការចាប់ពង្រត់ ការធ្វើទារុណកម្ម និងការកាត់ក្បាលចំណាប់ខ្មាំងឲ្យក្រុមរដ្ឋឥស្លាមនៅក្នុងប្រទេសស៊ីរី ចន្លោះឆ្នាំ ២០១២ដល់ឆ្នាំ២០១៥។

គាត់បានទទួលយកកិច្ចព្រមព្រាងដែលរួមមានតម្រូវការកិច្ចសហប្រតិបត្តិការ និងបានចៀសវាងការជាប់ទោសនៅពន្ធនាគារ ADX Florence ក្នុងរដ្ឋ Colorado។

ឥឡូវនេះ ពោលគឺតិចជាងប្រាំមួយខែក្រោយមក គាត់មិនត្រូវបានចុះបញ្ជីថាស្ថិតនៅក្នុងមន្ទីរឃុំឃាំង BOP លើគេហទំព័ររបស់ប្រព័ន្ធពន្ធនាគារទេ ហើយគេក៏​មិន​ទាន់​ដឹង​ច្បាស់ដែរ​ថា លោក Kotey ស្ថិត​នៅ​ទី​ណា​ឲ្យពិតប្រាកដ។

អ្នកនាំពាក្យ BOP លោក Donald Murphy បានបញ្ជាក់ទៅកាន់កាសែត The Scottish Daily Record ថា លោក Alexanda Amon Kotey បច្ចុប្បន្នមិនស្ថិតនៅក្នុងការឃុំឃាំងរបស់ BOP ទេ ប៉ុន្តែ​មិន​បាន​បង្ហាញ​ពី​មូលហេតុណាមួយឡើយ។

អ្នកនាំពាក្យរូបនេះក៏បានកត់សម្គាល់ផងដែរថា BOP មិនអាចផ្តល់ព័ត៌មានលម្អិតជាក់លាក់អំពីអ្នកទោសបានទេ ដោយសារហេតុផលសុវត្ថិភាព សន្តិសុខ ឬឯកជនភាព។

គួរបញ្ជាក់ថា លោក Kotey គឺជាសមាជិកនៃក្រុមភេរវករ “Beatle” ដែលដឹកនាំគម្រោងចាប់ចំណាប់ខ្មាំង ដោយបានចាប់ជនជាតិលោកខាងលិចរាប់សិបនាក់ជាឈ្លើយ​ កាលពីមួយទសវត្សរ៍មុន។

រូបរាងរបស់ពួកគេ តែងតែធ្វើឲ្យដក់ជាប់ក្នុងភាពភ័យខ្លាចរបស់ចំណាប់ខ្មាំង។ ពិភពលោកក៏ភ័យរន្ធត់ផងដែរចំពោះវីដេអូឃោសនារបស់ពួកគេ ដែលក្នុងនោះជនរងគ្រោះ ត្រូវបានគេដង្ហែក្នុងឈុតពណ៌ទឹកក្រូច មុនពេលត្រូវបានកាត់ក្បាល៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ក្រុម ISIS ប្រកាសពីការស្លាប់មេដឹកនាំ របស់ខ្លួន