ការបំផ្ទុះគ្រាប់បែកសម្លាប់មនុស្សនៅហ្វីលីពីន គឺជាស្នាដៃក្រុមរដ្ឋឥស្លាម

ក្រុមសកម្មប្រយុទ្ធរដ្ឋឥស្លាម បានអះអាងទទួលខុសត្រូវចំពោះការបំផ្ទុះគ្រាប់បែកដ៏ប្រល័យ នៅឯកន្លែងធ្វើពិធីកាតូលិកក្នុងប្រទេសហ្វីលីពីនកាលពីថ្ងៃអាទិត្យទី៣ខែធ្នូ ដែលបានសម្លាប់មនុស្ស៤នាក់ និង៥០នាក់ផ្សេងទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះ កើតឡើងនៅកន្លែងហាត់ប្រាណរបស់សាកលវិទ្យាល័យមួយ ក្នុងទីក្រុង Marawi ជាទីក្រុងនៅភាគខាងត្បូងប្រទេស ដែលត្រូវបានឡោមព័ទ្ធដោយក្រុមសកម្មប្រយុទ្ធមូស្លីមអស់រយៈពេលប្រាំខែ ក្នុងឆ្នាំ២០១៧។

ក្រុមរដ្ឋឥស្លាម បាននិយាយនៅលើឆានែល Telegram ថា សមាជិករបស់ខ្លួន គឺជាអ្នកបំផ្ទុះគ្រាប់បែក។

នៅព្រឹកថ្ងៃអាទិត្យ មុនការអះអាងរបស់ក្រុមរដ្ឋឥស្លាម, ប្រធានាធិបតីហ្វីលីពីន លោក Ferdinand Marcos Jr បានថ្កោលទោសចំពោះទង្វើគ្មានប្រយោជន៍និងសាហាវបំផុត ដែលប្រព្រឹត្តដោយភេរវករបរទេស ខណៈប៉ូលិសនិងយោធា បានពង្រឹងសន្តិសុខនៅភាគខាងត្បូងប្រទេស និងជុំវិញរដ្ឋធានីម៉ានីល។

ស្របពេលជាមួយគ្នានោះដែរ រដ្ឋមន្ត្រីការពារជាតិ Gilberto Teodoro បានប្រាប់សន្និសីទសារព័ត៌មានមួយថា ប្រតិបត្តិការអនុវត្តច្បាប់ ដើម្បីកាត់ទោសជនល្មើសធ្វើសកម្មភាពភេរវក នឹង បន្តឥតឈប់។

លោក Teodoro បញ្ជាក់ថា សកម្មភាពនេះ មានការបង្គាប់បញ្ជាពីបរទេស ប៉ុន្តែបានបដិសេធ បញ្ជាក់លម្អិត ព្រោះការស៊ើបអង្កេតកំពុងបន្ត៕

ប្រែសម្រួល៖ Vann Vann

ប្រភព៖ CNA

ចុចអាន៖ ជនបំផ្ទុះគ្រាប់បែកអត្តឃាតក្រុម ISIS ធ្វើដំណើរទៅវាយប្រហារនៅ ឥណ្ឌា តែត្រូវស្ទាក់ចាប់ទាន់