រដ្ឋមន្ត្រីសុខាភិបាលអង់គ្លេសព្រមាន បើ រុស្ស៊ី ឈានជើងតែម្ខាងចូលទឹកដី ណាតូ សង្រ្គាមនឹងផ្ទុះឡើង (មានវីដេអូ)

ចក្រភពអង់គ្លេស បានព្រមានលោក Vladimir Putin ថា ប្រសិនបើទាហានរុស្ស៊ីឈានជើងតែម្ខាងចូលទៅក្នុងទឹកដី ណាតូ នោះសង្រ្គាមនឹងផ្ទុះឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីសុខាភិបាលលោក Sajid Javid បាននិយាយថា លោកខាងលិចបានបញ្ជាក់ច្បាស់អំពីការឆ្លើយតប ចំពោះការលុកលុយណាមួយនៅលើទឹកដីរបស់ខ្លួន បន្ទាប់ពីមានការទម្លាក់គ្រាប់បែកនៅជិតព្រំដែន ប្រទេសប៉ូឡូញ សម្លាប់​មនុស្ស ៣៥ នាក់ និង​របួស ១៣៤ នាក់។

មូលដ្ឋានយោធា Yavoriv ត្រូវបានកំណត់គោលដៅ នៅក្នុងការវាយប្រហារដោយគ្រាប់មីស៊ីលកាលពីថ្ងៃអាទិត្យទី១៣ខែមីនា ដែលមានចម្ងាយត្រឹមតែប៉ុន្មានគីឡូម៉ែត្រប៉ុណ្ណោះពីព្រំដែនប៉ូឡូញ។

លោក Javid បានថ្កោលទោសការវាយប្រហារនោះ ហើយព្រមានលោក Putin ថា លោកអាចប្រឈមមុខនឹងសង្គ្រាមជាមួយប្រទេសចំនួន ៣០ នៃអង្គការណាតូ ប្រសិនបើលោកប៉ះពាល់ទឹកដីរបស់ពួកគេ។

លោកបានប្រាប់ Sky News ថា “ប្រសិនបើទាហានរុស្ស៊ីឈានជើងតែម្ខាងចូលទឹកដី ណាតូ នោះ នឹងមានសង្រ្គាមជាមួយ ណាតូ ជាក់ជាមិនខាន”។

ស្របពេលជាមួយគ្នានោះ លោក Javid ក៏បានចោទប្រកាន់រុស្ស៊ីពីបទឧក្រិដ្ឋកម្មសង្រ្គាម ផងដែរ ដោយការវាយប្រហារមន្ទីរពេទ្យសម្ភពមួយកន្លែងក្នុងទីក្រុង Mariupol។

គួរបញ្ជាក់ថា រហូតមកដល់ពេលនេះ ចក្រភពអង់គ្លេស និងបណ្តាប្រទេសណាតូផ្សេងទៀត បានអត់ធ្មត់មិនបញ្ជូនទាហានចូលទៅអ៊ុយក្រែនទេ ដោយខ្លាចថា វាអាចបណ្តាលឲ្យមានការរីកកាន់តែធំនៅក្នុងជម្លោះជាមួយប្រទេសរុស្ស៊ី ដែលមានអាវុធនុយក្លេអ៊ែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Mirror

ចុចអាន៖ ប្រជុំគ្នាម្សិលមិញ អាមេរិក ព្រមាន ចិន ខ្លាំងៗពាក់ព័ន្ធរឿង រុស្ស៊ី