ទណ្ឌកម្មចាប់ផ្តើមប៉ះពាល់ ប្រជាជនរុស្ស៊ី សម្រុកទៅផ្សារ ដណ្តើមគ្នាទិញទំនិញស្តុកទុក 

ប្រជាជនរុស្ស៊ី កំពុងប្រជែងគ្នាទិញទំនិញនៅតាមផ្សារទំនើប ខណៈដែលការដាក់ទណ្ឌកម្ម ចាប់ផ្តើមប៉ះពាល់ដល់ការផ្គត់ផ្គង់សំខាន់ៗ។

ការដណ្តើមគ្នាទិញស្ករ.ស ត្រូវបានគេឃើញនៅក្នុងហាង Perekryostok ភាគខាងជើង ទីក្រុង មូស្គូ។ 

អ្នកឃើញហេតុការណ៍​ម្នាក់​បាន​និយាយ​ថា “​មនុស្ស​កំពុង​ប្រយុទ្ធគ្នា​ដើម្បីទិញ​ស្ករ។ និវត្តជនកំពុងប្រយុទ្ធគ្នា”។

រូបិយបណ្ណ រូប របស់រុស្ស៊ីបានបាត់បង់តម្លៃជិត ៥០% ចាប់តាំងពីដើមឆ្នាំ២០២២មក ដោយរូបិយបណ្ណនេះបានធ្លាក់ចុះយ៉ាងខ្លាំង បន្ទាប់ពីលោក ពូទីន​ ប្រកាសសង្រ្គាមនៅអ៊ុយក្រែន។

ប្រជាពលរដ្ឋម្នាក់​បាន​និយាយ​ថា “​មានតែ​ធ្នើរ​ទទេ គ្មាន​អំបិល គ្មាន​ស្ករ គ្មាន​ប៉ាស្តា គ្មាន​គ្រាប់ធញ្ញជាតិខ្មី ហើយមានតែ​អង្ករ​ថ្លៃៗ​ប៉ុណ្ណោះ​។ ភ្លាមៗនោះ មនុស្សម្នាបានឃើញរទេះដាក់ស្ករ ហើយរត់ទៅរក។ ពួកគេបានដណ្តើមគ្នាយករទេះនោះ ដោយរុញគ្នាទៅវិញទៅមកយ៉ាងចាស់ដៃ។ ពួកគេ​ព្យាយាម​យកឲ្យ​បាន​ច្រើន​តាម​ដែល​អាច​ធ្វើ​ទៅ​បាន ដោយ​មិន​ទុក​ស្ករ​ឲ្យ​អ្នក​ដទៃ​ឡើយ”។

ប្រជាជនរុស្ស៊ី ត្រូវបានគេជំរុញកុំឲ្យភ័យស្លន់ស្លោទៅទិញទំនិញ និងស្តុកអីវ៉ាន់ទុក ប៉ុន្តែមិនសូវមានអ្នកជឿលើក្រុមមន្ត្រីទេដែលធានាថា ការផ្គត់ផ្គង់នឹងអាចទប់ទល់ជាមួយទណ្ឌកម្មរបស់បស្ចិមប្រទេស ជុំវិញសង្គ្រាមរបស់លោក វ្ល៉ាឌីមៀរ ពូទីន នៅអ៊ុយក្រែន។

រដ្ឋអាជ្ញារុស្ស៊ី បានចាប់ផ្តើមត្រួតពិនិត្យនៅក្នុងតំបន់ចំនួន២៦ ជុំវិញការសង្ស័យនៃការដំឡើងតម្លៃខ្ពស់ហួសហេតុ។

នៅក្នុងតំបន់ Primorsky តម្រូវការស្ករ បានកើនឡើង ៤០០ភាគរយ ខណៈដែលអាជ្ញាធរបានអង្វរឲ្យបញ្ឈប់ការសម្រុកទិញទុក។

ក្រសួងពាណិជ្ជកម្មក្នុងស្រុកបាននិយាយថា “ស្ករ៥០០ តោនត្រូវបានគេរំពឹងថានឹងដឹកជញ្ជូនទៅកាន់តំបន់ក្នុងពេលឆាប់ៗនេះ”៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ជប៉ុន ប្រទះឃើញនាវាចម្បាំងរុស្ស៊ីដឹកសុទ្ធតែរថយន្តយោធា ឆ្លងកាត់កោះរបស់ខ្លួន ទំនងទៅអ៊ុយក្រែន