អាមេរិក ផ្ដល់ជំនួយយោធាថ្មីរាប់លានដុល្លារទៀតឲ្យ អ៊ុយក្រែន

រដ្ឋមន្ត្រីការបរទេសអាមេរិកលោក Antony Blinken បាននិយាយកាលពីថ្ងៃសៅរ៍ថា សហរដ្ឋអាមេរិកបានបែងចែកជំនួយយោធាចំនួន ៤០០ លានដុល្លារបន្ថែមទៀតដល់អ៊ុយក្រែន ដោយនាំឲ្យចំនួនជំនួយសរុបកើនដល់ទៅជាង ៧ ពាន់លានដុល្លារហើយ ។

លោក Blinken បាននិយាយនៅក្នុងសេចក្តីថ្លែងការណ៍មួយថា “យោងតាមការផ្ដល់សិទ្ធិអំណាចពីប្រធានាធិបតី ខ្ញុំកំពុងអនុញ្ញាតឲ្យបញ្ចេញកញ្ចប់អាវុធ និងឧបករណ៍ផ្សេងៗលើកទី ១៥ របស់យើងពីស្តុករបស់ក្រសួងការពារជាតិសហរដ្ឋអាមេរិកដែលមានទឹកប្រាក់រហូតដល់ ៤០០ លានដុល្លារសម្រាប់ផ្ដល់ឲ្យអ៊ុយក្រែនដើម្បីការពារខ្លួន ចាប់តាំងពីខែសីហា ឆ្នាំ២០២១” ។

បើយោងតាមសេចក្តីថ្លែងការណ៍បានឲ្យដឹងថា បើគិតសរុបសម្រាប់កញ្ចប់ជំនួយយោធារបស់សហរដ្ឋអាមេរិកដែលផ្ដល់ឲ្យអ៊ុយក្រែននៅពេលនេះគឺឡើងដល់ជាង ៧.៣២ ពាន់លានដុល្លារហើយ ចាប់តាំងពីប្រទេសរុស្ស៊ីបានចាប់ផ្តើមប្រតិបត្តិការយោធារបស់ខ្លួននៅក្នុងប្រទេស ។

សេចក្តីថ្លែងការណ៍បានបន្ថែមថា “លោក Blinken ក៏បានកោតសរសើរដល់ប្រជាជនអ៊ុយក្រែនដែលបន្តការការពារជាតិរបស់ពួកគេយ៉ាងក្លាហាន ក៏ដូចជាហ៊ានប្រឈមមុខនឹងសង្គ្រាមលុកលុយដោយខុសច្បាប់របស់រុស្ស៊ី ហើយសហរដ្ឋអាមេរិកនឹងឈរក្បែរពួកគេឲ្យបានយូរតាមដែលអាចធ្វើទៅបាន” ។

នៅថ្ងៃដដែលនោះលោក Blinken ក៏បានប្រកាសកញ្ចប់ជំនួយមនុស្សធម៌បន្ថែមដល់អ៊ុយក្រែនដែលមានតម្លៃជិត ៣៦៨ លានដុល្លារ ពោលកើនឡើងសរុបចំនួន ១.២៨ ពាន់លានដុល្លារសម្រាប់ជំនួយដល់រដ្ឋាភិបាលទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik