ដឹងទេ នាយករដ្ឋមន្ត្រី ប្រទេសណាខ្លះហើយមក កម្ពុជា មុនកិច្ចប្រជុំអាស៊ាន

គិតត្រឹមពេលនេះ នាយករដ្ឋមន្ត្រីប្រទេសចំនួន ២ ហើយបានមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា ក្នុងនោះមានដូចជា លោក ផាម មិញជិញ នាយករដ្ឋមន្ត្រីវៀតណាម និងលោក លី ខឺឈាង នាយករដ្ឋមន្ត្រីប្រទេសចិន ។

លោក ផាម មិញជិញ បានអញ្ជើញមកដល់កម្ពុជាដូចការគ្រោងទុក នៅព្រឹកថ្ងៃទី ៨ ខែវិច្ឆិកា ឆ្នាំ២០២២ ពោលតបតាមការអញ្ជើញរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងបានចុះហត្ថលេខាលើឯកសារសំខាន់ៗចំនួន ១១ ផងដែរ ។

ទន្ទឹមនោះ ដំណើរទស្សនកិច្ច របស់លោកនាយករដ្ឋមន្ត្រីវៀតណាម ក៏ស្របនឹងការប្រារព្ធខួបអនុស្សាវរីយ៍លើកទី ៥៥ នៃការបង្កើតទំនាក់ទំនងការទូតរវាងប្រទេសទាំងពីរ ដែលត្រូវបានកំណត់ជា “ឆ្នាំមិត្តភាពកម្ពុជា-វៀតណាម” ។

ដោយឡែកលោក លី ខឺឈាង នាយករដ្ឋមន្ត្រីចិន និងភរិយាបានអញ្ជើញមកដល់ព្រះរាជាណាចក្រកម្ពុជានាម៉ោងប្រមាណ ៧ និង ៣០ នាទីយប់ថ្ងៃទី ៨ ខែវិច្ឆិកា ឆ្នាំ២០២២ ក្នុងដំណើរទស្សនកិច្ចផ្លូវការរយៈពេល ៤ ថ្ងៃ ។

ស្របពេលជាមួយគ្នានេះ លោក លី ខឺឈាង ក៏ត្រូវបានគេរំពឹងថា នឹងចូលរួមកិច្ចប្រជុំកំពូលអាស៊ានលើកទី ៤០ និង ៤១ ក៏ដូចជាកិច្ចប្រជុំពាក់ព័ន្ធ ដែលកម្ពុជាធ្វើជាម្ចាស់ផ្ទះផងដែរ ៕

អត្ថបទ ៖ ជីវ័ន្ត

ចុចអាន ៖ អាមេរិក ប្រាប់ផែនការ បើ កូរ៉េខាងជើង សាកល្បងនុយក្លេអ៊ែរ