ព័ត៌មានអន្ដរជាតិ

ចោរបម្រុងចូលប្លន់ហាងមាសនៅថៃ ត្រូវម្ចាស់ហាងបាញ់ឲ្យរបួសដង្ហើមចង្រិតម្នាក់

បានផុស

១ year មុន

នៅ

ថ្ងៃសុក្រ ៩ ធ្នូ ២០២២

ដោយ

ប្រទេសថៃ ៖ យ៉ាងហោចណាស់ក៏មានបក្ខពួកចោរចំនួន ១ នាក់ដែរ ដែលត្រូវម្ចាស់ហាងមាសបាញ់បណ្ដាលឲ្យរបួសធ្ងន់ និង ១ នាក់ទៀត ត្រូវបានចាប់ខ្លួន ខណៈក្រុមចោរមានគ្នាចំនួន ៤ នាក់ កំពុងចូលប្លន់ក្នុងហាងមាសមួយកន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដ៏ភ្ញាក់ផ្អើលនេះ បានកើតឡើងកាលពីថ្ងៃទី ៨ ខែធ្នូ ឆ្នាំ ២០២២ វេលាម៉ោង ១២ និង ៥៥ នាទីថ្ងៃត្រង់ ក្នុងហាងលក់មាសមួយកន្លែង ស្ថិតនៅកណ្ដាលទីរួមខេត្ត តាក ភាគខាងត្បូង នៃប្រទេសថៃ។

បើតាមការផ្សាយរបស់គេហទំព័រមួយចំនួនក្នុងប្រទេសថៃ បានបញ្ជាក់ថា នៅមុនពេលកើតហេតុ គឺមានជនសង្ស័យចំនួន ៤ នាក់ ស្លៀកពាក់ខ្មៅ ជិះម៉ូតូ ២ គ្រឿង ប្រដាប់ដោយអាវុធខ្លីគ្រប់ដៃ បានចូលទៅខាងក្នុងហាងលក់មាស ព្រមទាំងធ្វើសកម្មភាពវាយបំបែកទូកញ្ចក់ ដើម្បីប្រមូលយកមាស ប៉ុន្តែភ្លាមៗនោះដែរ ម្ចាស់ហាងចិត្តសឿង បានទាញកាំភ្លើងវែង បាញ់ស្រោចទៅលើក្រុមចោរ បណ្ដាលឲ្យចោរបាក់ស្បាតរត់ចេញទៅវិញ។ ក្នុងនោះដែរ ចោរម្នាក់ បានរងរបួសជាទម្ងន់ និងចោរម្នាក់ទៀត ត្រូវសមត្ថកិច្ចចុះមកទាន់ ក៏ចាប់ខ្លួនបាន។ ដោយឡែកចោរពីរនាក់ដែលបើកម៉ូតូរត់គេច កំពុងត្រូវបានសមត្ថកិច្ចតាមប្រមាញ់ហើយ។

គួរបញ្ជាក់ថា ម្ចាស់ហាង និងបុគ្គលិក ពុំមាននរណាម្នាក់រងរបួសនោះទេ។ ម្យ៉ាងទៀតម្ចាស់ហាង គឺជាកីឡាករជំនាញខាងបាញ់កាំភ្លើងត្រង់ រហូតប្រលងទទួលបានពានរង្វាន់ថែមទៀតផង៕

អត្ថបទ ៖ សោ និយមរ័ត្ន