រកឃើញ កងទ័ពជើងទឹកថៃ ស្លាប់កើនដល់២២នាក់ ខណៈ ៧នាក់ បាត់ខ្លួន

គិតត្រឹមម៉ោង ៨ និង២០នាទីព្រឹកថ្ងៃពុធទី២៨ខែធ្នូនេះ សាកសពនាវិកកងទ័ពជើងទឹកថៃម្នាក់ទៀត ត្រូវបានរកឃើញលើឆ្នេរកោះ Samet នៃខេត្ត Chumphon ភាគខាងត្បូងប្រទេសថៃ ដែលធ្វើឲ្យអ្នកស្លាប់ក្នុងហេតុការណ៍លិចនាវាចម្បាំង HTMS Sukhothai កើនដល់២២នាក់។

នៅក្នុងសេចក្តីប្រកាសព័ត៌មាន អ្នកនាំពាក្យកងនាវាចរថៃ ឧត្តមនាវីឯក Pokrong Monthatphalin បាននិយាយថា នាវិកចំនួន ៧៦ នាក់ ក្នុងចំណោមនាវិកទាំង ១០៥ នាក់បានរួចជីវិត បន្ទាប់ពីនាវាលិចក្នុងសមុទ្រនៃខេត្ត Prachuap Khiri Khan កាលពីថ្ងៃទី ១៨ ខែធ្នូ។

លោកបន្តថា សាកសពចំនួន២០ក្នុងចំណោមសាកសពទាំង២២ ដែលរកឃើញពីឈូងសមុទ្រថៃ គឺត្រូវបានកំណត់អត្តសញ្ញាណ ហើយពីរនាក់ទៀត កំពុងស្ថិតក្នុងដំណើរការកំណត់អត្តសញ្ញាណ។ ទោះបីជាយ៉ាងណាក៏ដោយ បច្ចុប្បន្ននាវិកចំនួន ៧នាក់នៅតែបាត់ខ្លួន។

ថ្ងៃនេះ សាកសពនាវិកនៃនាវាចម្បាំង HTMS Sukhothai ចំនួន១០នាក់ នឹងត្រូវបូជានៅទីបញ្ចុះសពកងទ័ពជើងទឹក Sattahip។

កងទ័ពជើងទឹក បានបង្កើតគណៈកម្មាធិការមួយ ដើម្បីស៊ើបអង្កេតមូលហេតុនៃការលិចនាវា និងអ្នកដែលអ្នកទទួលខុសត្រូវ។ លទ្ធផលនៃការស៊ើបអង្កេត នឹងត្រូវបង្ហាញជាសាធារណៈពេលចប់រួចរាល់៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ថៃ រកឃើញសាកសពនាវិក ៦នាក់ ក្នុងហេតុការណ៍ លិចនាវាចម្បាំង