គណៈកម្មាធិការរៀបចំសេចក្តីព្រាងច្បាប់ថ្មីស្តីពីពេស្យាចារ បានយល់ស្របថា សេវាផ្លូវភេទដោយស្ម័គ្រចិត្ដ គឺគួរតែត្រូវបានអនុញ្ញាតដល់មនុស្សចាប់ពីអាយុ២០ឆ្នាំឡើងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីបានធ្វើជាអធិបតីក្នុងកិច្ចប្រជុំគណៈកម្មាធិការរៀបចំសេចក្តីព្រាងច្បាប់ថ្មី លោកស្រី Jintana Chanbamroong ប្រធាននាយកដ្ឋានកិច្ចការនារី និងអភិវឌ្ឍគ្រួសារ នៃក្រសួងអភិវឌ្ឍសង្គម និងសន្តិសុខមនុស្ស បាននិយាយថា សវនាការសាធារណៈទាំងតាមប្រព័ន្ធអនឡាញ និងនៅនឹងកន្លែង បានធ្វើឡើងនៅក្នុងទីក្រុងចំនួន៥រួមមានទីក្រុងបាងកក ឈុនបុរី និងហាតយ៉ៃ ផងដែរ។

សវនាការរបស់ក្រុមស្ទង់មតិ ​ក៏​ត្រូវ​បាន​ធ្វើ​ឡើងផងដែរ ហើយ​សំណើត្រូវ​ដាក់​ទៅ​រដ្ឋមន្ត្រី​អភិវឌ្ឍន៍​សង្គម និង​សន្តិសុខ​មនុស្ស​លោក Juti Krairiksh។

ដំបូងឡើយ សេចក្តីព្រាងច្បាប់នេះត្រូវបានគេហៅថាជា “សេចក្តីព្រាងច្បាប់សម្រាប់ការការពារសេវាផ្លូវភេទ” ហើយវា​គ្រោង​នឹង​ជំនួស​ច្បាប់​បង្ការ និង​បង្ក្រាប​អំពើ​ពេស្យាចារ​ឆ្នាំ១៩៩៦។

សំណើនេះគឺផ្តោតសំខាន់បំផុត លើការការពារស្រីពេស្យាស្ម័គ្រចិត្ត ដែលមានអាយុអប្បបរមាសម្រាប់ការផ្តល់សេវាផ្លូវភេទ២០ឆ្នាំ ដោយគ្មានការផ្តន្ទាទោសព្រហ្មទណ្ឌ។

ពួកគេនឹងមានសិទ្ធិ និងទទួលបានសុខុមាលភាពក្នុងប្រព័ន្ធការងារ ដោយមិនត្រូវបានកំណត់ថាជាអ្នករកស៊ីផ្លូវភេទ។ ពួកគេ​ក៏​នឹង​មាន​សិទ្ធិ​ទទួល​បាន​សំណង​សមរម្យ​ផងដែរ ប៉ុន្តែ​ត្រូវ​ឆ្លងកាត់​ការ​ពិនិត្យ​សុខភាពជាមុនសិន ​ដើម្បី​ធានា​ថា​ពួកគេ​មិន​ឆ្លង​ជំងឺ​ឆ្លង​ណាមួយ​ឡើយ។

ទោះបីជាយ៉ាងណាក៏ដោយ ពេស្យាកម្មដែលស្ថិតក្នុងប្រភេទនៃការជួញដូរមនុស្ស ដូចជាលទ្ធកម្ម ឬការបង្ខិតបង្ខំ នៅតែជាការបំពានលើច្បាប់ស្តីពីការជួញដូរមនុស្ស។

អ្នកបើកទីតាំងរកស៊ីផ្លូវភេទ ត្រូវបានកំណត់ឲ្យបើកប្រតិបត្តិការតែនៅក្នុងតំបន់ជាក់លាក់ប៉ុណ្ណោះ ជាពិសេសមិនឲ្យបើកនៅជិតគ្រឹះស្ថានអប់រំ ឬកន្លែងគោរពបូជាឡើយ៕

ប្រែសម្រួល៖ Vann Vann

ប្រភព៖ Thai Newsroom

ចុចអាន៖ ថៃ ជំរុញឲ្យលើកកម្ពស់ការជល់មាន់ ដើម្បីទាក់ទាញទេសចរ ជួយសេដ្ឋកិច្ច