ជប៉ុន អនុញ្ញាតឲ្យសាងសង់កាស៊ីណូជាលើកដំបូងនៅក្នុងប្រទេស

ក្រុមមន្រ្តីរដ្ឋាភិបាលជប៉ុន បានអនុញ្ញាតឲ្យដំណើរការគម្រោងរមនីយដ្ឋានថ្មីមួយនៅក្នុងទីក្រុង Osaka ដែលគម្រោងនេះ នឹងសាងសង់ចេញជា កាស៊ីណូ ដំបូងនៅក្នុងប្រទេសនេះ។ នេះបើតាមការចុះផ្សាយរបស់សារព័ត៌មានរុស្ស៊ី RT នៅព្រឹកថ្ងៃសៅរ៍នេះ។

គម្រោងរមនីយដ្ឋាន និងកាស៊ីណូនេះ គ្រោងនឹងចំណាយការសងសង់ដល់ប្រមាណ១៣.៥ ពាន់លានដុល្លារអាមេរិក ហើយគ្រោងនឹងបើកដំណើរការនៅក្នុងឆ្នាំ២០២៩ខាងមុខនេះ។ គម្រោងរមនីយដ្ឋាន និងកាស៊ីណូនេះ ធ្វើឡើងក្នុងគោលបំណងទាក់ទងភ្ញៀវទេសចរជាតិ និងអន្តរជាតិឲ្យបានក្នុងចំនួន២០លាននាក់។

គួរជម្រាបជូនថា កាស៊ីណូ នៅតែជាអាជីវកម្មខុសច្បាប់នៅក្នុងប្រទេសជប៉ុនរហូតមកដល់ឆ្នាំ២០១៨ ប៉ុន្តែ បើទោះបីមានការអនុញ្ញាតឲ្យស្របច្បាប់វិញក៏ដោយ ក៏គម្រោងបង្កើតក្រុមហ៊ុនល្បែងជាលើកដំបូងនៅក្នុងប្រទេសជប៉ុននៅតែគាំងដំណើរការរហូតមកដល់ពេលបច្ចុប្បន្ន។ នេះ គឺដោយសារតែបញ្ហារីករាលដាលនៃជំងឺកូវីដ១៩ និងរឿងអាស្រូវពុករលួយរហូតឈាន​ដល់ការចាប់ខ្លួនអ្នកតំណាងរាស្រ្តជប៉ុ​នជាន់ខ្ពស់ម្នាក់ថែមទៀតផង៕