ថៃ បញ្ជាឲ្យរាប់សន្លឹកឆ្នោតឡើងវិញ នៅការិយាល័យខ្លះ

គណៈកម្មាធិការរៀបចំការបោះឆ្នោតថៃ (EC) បានបញ្ជាឲ្យរាប់សន្លឹកឆ្នោតឡើងវិញ ពីការិយាល័យបោះឆ្នោតចំនួន៤៧ បន្ទាប់ពីរកឃើញថា សន្លឹកឆ្នោតសរុប គឺមិនស៊ីគ្នានឹងចំនួនអ្នកទៅបោះឆ្នោត ក្នុងការបោះឆ្នោតសកលថ្ងៃទី១៤ខែឧសភា។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមការិយាល័យទាំង៤៧នោះ មានការិយាល័យចំនួន១៦ ត្រូវបានបញ្ជាឲ្យរាប់សន្លឹកឆ្នោតឡើងវិញសម្រាប់អាសនៈមណ្ឌល ខណៈ៣១ការិយាល័យ ត្រូវរាប់សន្លឹកឆ្នោតឡើងវិញសម្រាប់អាសនៈក្នុងបញ្ជីគណបក្ស។

ប្រភពខាងលើបន្ថែមថា ពេលខ្លះចំនួនអ្នកទៅបោះឆ្នោតអាចខ្ពស់ជាងចំនួនសន្លឹកឆ្នោត ប្រសិនបើអ្នកបោះឆ្នោតបង្ហាញសិទ្ធិរបស់ខ្លួនក្នុងការទៅបោះឆ្នោត ប៉ុន្តែមិនគូសសន្លឹកឆ្នោតនៅក្នុងបន្ទប់ រួចក៏ចាកចេញពីការិយាល័យបោះឆ្នោតវិញ។

ប្រភព​ដដែល​បន្ត​ថា ក្រុម​ឃ្លាំ​មើល​ការ​បោះ​ឆ្នោត​ បាន​ឈាន​ដល់​ការ​សន្និដ្ឋាន ដោយ​បញ្ជាឲ្យ​រាប់​សន្លឹក​ឆ្នោត​ឡើង​វិញ ព្រោះ​គេ​ជឿ​ថា ​ភាព​មិន​ប្រក្រតី ​អាច​ប៉ះពាល់​ដល់​លទ្ធផល​ចុង​ក្រោយ, ចំណាត់​ថ្នាក់​បេក្ខជន​តំណាង​រាស្ត្រ និង​ប្រជាប្រិយភាព​ដែល​គណបក្ស​នីមួយៗ​ទទួល​បាន។

ទោះបីជាយ៉ាងណាក៏ដោយ EC មិនទាន់បង្ហាញឈ្មោះការិយាល័យទាំង៤៧ និងខេត្តទាំងនោះនៅឡើយទេ ប៉ុន្តែគេរំពឹងថា ការរាប់សន្លឹកឆ្នោតសាជាថ្មី នឹងធ្វើឡើងនៅថ្ងៃអាទិត្យទី១១ខែមិថុនា ហើយលទ្ធផលដែលបានធ្វើបច្ចុប្បន្នភាព នឹងប្រកាសក្នុងខែនេះ។

គួរបញ្ជាក់ថា តាមច្បាប់ប្រទេសថៃ គឺតម្រូវឲ្យ EC ត្រូវប្រកាសលទ្ធផលបោះឆ្នោតជាផ្លូវការក្នុងរយៈពេល៦០ថ្ងៃ បន្ទាប់ពីថ្ងៃបោះឆ្នោត៕

ប្រែសម្រួល៖ Vann Vann

ប្រភព៖ Nation

ចុចអាន៖ គណបក្សជាប់ឆ្នោតថៃ ចេញមុខបំភ្លឺ រឿងដែលថា ខ្លួនគ្រោងបណ្តេញពលករខ្មែរ