ថៃ អាចជួបប្រទះបញ្ហាអគ្គិសនី ដោយសារតែ​គ្រោះរាំងស្ងួត

បញ្ហាគ្រោះរាំងស្ងួតនៅឆ្នាំ​នេះ អាចនាំឲ្យថៃជួបប្រទះ​បញ្ហាការផ្គត់ផ្គង់ថាមពលអគ្គិសនីកកើតឡើងវិញ ដោយសារតែ​ប្រទេសនេះ បាននាំចូលអគ្គិសនីមួយចំនួនពីប្រទេសឡាវ ។

លោក Boonyanit Wongrukmit ទេសាភិបាលអគ្គិសនីថៃ បាននិយាយថា ប្រសិនបើគ្រោះរាំងស្ងួតកាន់តែធ្ងន់ធ្ងរ រោងចក្រវារីអគ្គិសនីក្នុងប្រទេសឡាវ នឹងផលិតអគ្គិសនីតិចជាងមុន ហើយវានឹងបណ្តាលឲ្យការនាំចូលមានធ្លាក់ចុះ ។

នៅក្នុងឆ្នាំនេះដែរ ថៃបានចុះកិច្ចសន្យាបន្ថែមការទិញអគ្គិសនីពីឡាវរហូតដល់ ១០,៥០០​ មេហ្គាវ៉ាត់ ។ ​អគ្គិសនីដែលផលិតដោយរោងចក្រវារីអគ្គីសនី គឺជាផ្នែកមួយនៃយុទ្ធនាការរបស់ថៃក្នុងការប្រយុទ្ធប្រឆាំងនឹងការបំភាយឧស្ម័នកាបូនិចដែលបង្កើតឡើងដោយការប្រើប្រាស់ឥន្ធនៈហ្វូស៊ីលនៅក្នុងប្រទេស ។

ទន្ទឹមនោះ ​ដើម្បីសម្រេចឲ្យបានគោលបំណងប្រយុទ្ធប្រឆាំងនឹងការឡើងកម្ដៅផែនដី និងឈានដល់អព្យាក្រឹតភាពកាបូននៅឆ្នាំ ២០៥០ ថៃ​បានព្យាយាមបង្កើតរោងចក្រផលិតថាមពលខ្នាតតូចជាច្រើននៅតាមតំបន់ និងរោងចក្រផលិតថាមពលពន្លឺព្រះអាទិត្យបណ្តែតទឹកជាដើម ៕

ប្រែសម្រួល៖ នាង រតនៈ

ប្រភព៖ Bangkok Post

ចុចអាន៖ លោក Pita អាចនឹងរួចផុតពីបណ្ដឹងកាន់កាប់ភាគហ៊ុនប្រព័ន្ធផ្សព្វផ្សាយ