មីយ៉ាន់ម៉ា ប្រកាសមិនធ្វើជាប្រធានអាស៊ាន ឆ្នាំ ២០២៦ ឡើយ

យោងតាមប្រភពការទូតបានឲ្យដឹងថា រដ្ឋាភិបាលយោធាមីយ៉ាន់ម៉ានឹងដកខ្លួនចេញពីប្រធានអាស៊ាននៅឆ្នាំ ២០២៦ ដោយសារតែស្ថានភាពវឹកវរនៅក្នុងប្រទេស ក៏ដូចជាការមិនទាន់ត្រៀមខ្លួនរួចរាល់នៅឡើយ ។

ចំណែកប្រធានអាស៊ាននៅឆ្នាំ២០២៦ នេះនឹងធ្លាក់ទៅលើប្រទេសហ្វីលីពីន ហើយមីយ៉ាន់ម៉ាអាចនឹងរៀបចំឡើងនៅឆ្នាំ២០២៧ ខណៈសាធារណរដ្ឋប្រជាធិបតេយ្យប្រជាមានិតឡាវ នឹងធ្វើជាប្រធានបន្តវេនពីប្រទេសឥណ្ឌូណេស៊ីនៅឆ្នាំក្រោយ ហើយបន្ទាប់​មកម៉ាឡេស៊ី​នឹង​ធ្វើជាប្រធាន​នៅ​ឆ្នាំ​ ២០២៥ ។

ពាក់ព័ន្ធនឹងបញ្ហានេះដែរ គឺបង្ហាញឲ្យឃើញពីភាពមិនច្បាស់លាស់នាពេលបច្ចុប្បន្ន និងអនាគតនៅក្នុងប្រទេស ក្រោយពេលដែលយោធាបានដណ្តើមអំណាចនៅខែកុម្ភៈ ឆ្នាំ២០២១ ហើយចាប់តាំងពីពេលនោះមក រដ្ឋាភិបាលទីក្រុងណៃពិដោ ត្រូវដោះស្រាយបញ្ហាយ៉ាងច្រើនទាំងផ្នែកនយោបាយ សេដ្ឋកិច្ច និងសង្គម ។

អ្វីដែលសំខាន់បំផុតទៀតនោះគឺ យោធាត្រូវប្រយុទ្ធប្រឆាំងនឹងការកើនឡើងនៃចលនាក្រុមតស៊ូ រួមទាំងកងកម្លាំងការពារប្រជាជន អង្គការប្រដាប់អាវុធជនជាតិភាគតិច និងកងជីវពលរាប់ពាន់នាក់ ស្របពេលដែលកាល​ពី​សប្តាហ៍​មុន ​យោធាបានប្រកាស​បន្ត​ដាក់​ប្រទេស​ក្នុងស្ថានភាពអាសន្ន​រយៈពេល ៦ ខែ​ទៀត ដោយធ្វើឲ្យការបោះឆ្នោតជាតិដែលកំណត់រៀបចំឡើងនៅក្នុងខែសីហានេះ ក៏ត្រូវបន្តលើកពេលបន្ថែមផងដែរ ។

ទោះយ៉ាងណា នេះមិនមែនជាលើកទីមួយឡើយសម្រាប់មីយ៉ាន់ម៉ាដែលប្រកាសមិនធ្វើជាប្រធានអាស៊ាន ពោលប្រទេសនេះក៏ធ្លាប់ដកខ្លួនចេញពីកៅអីមួយនេះផងដែរកាលពីឆ្នាំ ២០០៦ ហើយត្រូវបានជំនួសដោយប្រទេសឡាវ ដោយសារតែបញ្ហាស្ថានភាពក្នុងប្រទេស ។

គួរបញ្ជាក់ថា ធម្មនុញ្ញអាស៊ានបានកំណត់កៅអីប្រធានអាស៊ាន ត្រូវប្ដូរវេនជារៀងរាល់ឆ្នាំទៅតាមលំដាប់នៃអក្សរជាភាសាអង់គ្លេស ហើយប្រធានប្តូរវេននឹងត្រូវទទួលបន្ទុកទាំងកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ កិច្ចប្រជុំក្រុមប្រឹក្សាសម្របសម្រួលអាស៊ាន ក្រុមប្រឹក្សាសហគមន៍អាស៊ានទាំងបី ក៏ដូចជាកិច្ចប្រជុំគណៈកម្មាធិការអ្នកតំណាងអចិន្ត្រៃយ៍ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Nikkei Asia

ចុចអាន ៖ បក្សភឿថៃ ដាក់ចេញគោលនយោបាយ ៥ ចំណុច ធ្វើឲ្យពលរដ្ឋក្លាយជា អ្នកមាន មុនពេលចាស់ជរា