ភាគខាងត្បូងប្រទេសឥណ្ឌា ផ្ទុះមេរោគមានអត្រាស្លាប់ខ្ពស់ ត្រូវបង្ខំចិត្តបិទសាលារៀន និងកន្លែងធ្វើការ 

សាលារៀន និងកន្លែងធ្វើការនានា ត្រូវបានបិទនៅក្នុងផ្នែកខ្លះនៃរដ្ឋ Kerala ភាគខាងត្បូងប្រទេសឥណ្ឌា បន្ទាប់ពីមានការឆ្លងមេរោគ Nipah ដ៏កម្រចំនួន៥ករណី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មកទល់ពេលនេះ មនុស្ស២នាក់បានបាត់បង់ជីវិត ខណៈ៣នាក់ផ្សេងទៀត រួមទាំងកុមារម្នាក់ ផងដែរ កំពុងសម្រាកព្យាបាលនៅមន្ទីរពេទ្យ។

ទន្ទឹមនោះ អាជ្ញាធរបានធ្វើតេស្តមនុស្សចំនួន៧០៦នាក់ រួមទាំងបុគ្គលិកសុខាភិបា១៥៣នាក់ផងដែរ ដើម្បីពិនិត្យមើលការរីករាលដាលនៃមេរោគនេះ ខណៈពួកគេកំពុងរង់ចាំលទ្ធផល។

នេះ​គឺជា​ការ​ផ្ទុះ​មេរោគ Nipah លើកទី​បួន​នៅក្នុង​រដ្ឋ Kerala ចាប់​តាំង​ពី​ឆ្នាំ២០១៨មក។

អភិបាលរដ្ឋលោក Pinarayi Vijayan បានស្នើឲ្យប្រជាជន ចៀសវាងការជួបជុំជាសាធារណៈនៅទីក្រុង Kozhikode ក្នុងរដ្ឋ Kerala រយៈពេល១០ថ្ងៃសិន។

គាត់និយាយថា រដ្ឋាភិបាលកំពុងគិតគូរដល់ប្រជាជន ហើយស្នើដល់អ្នកទាំងអស់ ឲ្យអនុវត្តវិធានការបង្ការ ដោយពាក់ម៉ាស និងទៅមន្ទីរពេទ្យ សម្រាប់តែពេលណាមានអាសន្នប៉ុណ្ណោះ។

បើយោងតាមអង្គការសុខភាពពិភពលោក, Nipah គឺជាជំងឺឆ្លងពីសត្វមកមនុស្ស ជាពិសេសសត្វជ្រូកនិងប្រចៀវ។ វាក៏អាចឆ្លងតាមរយៈអាហារដែលមានមេរោគ និងតាមរយៈការប៉ះពាល់ជាមួយអ្នកដែលមានមេរោគផងដែរ។

អ្នកដែលឆ្លងវីរុសនេះ ជួនកាលមិនបង្ហាញរោគសញ្ញាអ្វីគួរឲ្យកត់សម្គាល់ទេ ប៉ុន្តែមានអ្នកខ្លះចេញសញ្ញានៃបញ្ហាផ្លូវដង្ហើមស្រួចស្រាវ។ ក្នុងករណីធ្ងន់ធ្ងរ ការឆ្លងមេរោគ Nipah អាចបណ្តាលឲ្យមានជំងឺរលាកខួរក្បាលលើទារក។

អត្រាមរណៈក្នុងចំណោមអ្នកឆ្លងមេរោគគឺខ្ពស់បំផុត ដោយសារតែវាមិនមានថ្នាំព្យាបាល ឬវ៉ាក់សាំងបង្ការទេ ពោលគឺការព្យាបាល ត្រូវបានកំណត់ចំពោះរោគសញ្ញាប៉ុណ្ណោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ អ្នកវិទ្យាសាស្រ្តព្រមាន វីរុសបណ្តាលឲ្យហើមខួរក្បាល អាចជារោគរាតត្បាតបន្ទាប់ពី កូវីដ