កត្តា៤យ៉ាង បណ្តាលឲ្យទឹកជំនន់នៅលីប៊ី សម្លាប់មនុស្សច្រើនបែបនេះ

មនុស្សជាង២០០០០នាក់ ត្រូវបានគេគិតថា បាត់បង់ជីវិតក្នុងរយៈពេលត្រឹមប៉ុន្មានថ្ងៃប៉ុណ្ណោះ ដោយសារគ្រោះទឹកជំនន់ដ៏មហន្តរាយនៅប្រទេសលីប៊ី។

ទីក្រុងភាគខាងកើត Derna ដែលមានប្រជាជនប្រមាណ១០ម៉ឺននាក់ គឺជាចំណុចកណ្តាលនៃសោកនាដកម្មនេះ។

ស្របពេលជាមួយគ្នានោះ ចំនួនអ្នកបាត់ខ្លួន ត្រូវបានគេសន្មតថាមានយ៉ាងតិច ១០០០០នាក់ ថ្វីបើសារព័ត៌មាន CNN មិនអាចផ្ទៀងផ្ទាត់តួលេខនេះបានក៏ដោយ។

យ៉ាងណាក្តី មនុស្សជាច្រើននៅតែមានមន្ទិលសង្ស័យថាតើ ​ហេតុអ្វីបានជាគ្រោះទឹកជំនន់នៅលីប៊ី បណ្តាលឲ្យមានអ្នកស្លាប់ច្រើនបែបនេះ។

ដូច្នេះហើយ អ្នកជំនាញក៏បានបង្ហាញកត្តាចំនួន៤ដែលរួមចំណែក បង្កជាសោកនាដកម្មនេះ៖

១. ព្យុះភ្លៀងខ្លាំង បណ្តាលឲ្យបាក់ទំនប់

ភ្លៀងធ្លាក់ខ្លាំង ដែលវាយប្រហារប្រទេសលីប៊ីកាលពីសប្តាហ៍មុន គឺបង្កឡើងដោយព្យុះ Daniel។

បន្ទាប់ពីវាយប្រហារប្រទេសក្រិក តួកគី និងប៊ុលហ្គារី, ព្យុះនេះបានចូលដល់សមុទ្រមេឌីទែរ៉ាណេ។ វាបាននាំមកជាមួយនូវទឹកភ្លៀងកម្រិតលើសពី៤១៤មិល្លីម៉ែត្រ ក្នុងរយៈពេល២៤ម៉ោងនៅភាគខាងលិចទីក្រុង Derna ដែលជាកំណត់ត្រាថ្មីមួយ។

ដោយសារតែកម្រិតភ្លៀងធ្លាក់ខ្លាំងបែបនេះហើយ ទើបធ្វើឲ្យទឹកឡើងខ្ពស់ ឈានដល់ការបាក់ទំនប់រហូតទៅដល់២។

២. បាក់ទំនប់ចំពេលមនុស្សកំពុងលង់លក់ក្នុងដំណេក

ទំនប់ទឹក បានបាក់ធ្លាយនៅម៉ោង៣ទាបភ្លឺ ជាពេលដែលមនុស្សកំពុងដេកលក់យ៉ាងស្កប់ស្កល់។

៣. ទីក្រុង Derna ងាយនឹងរងគ្រោះដោយទឹកជំនន់

ទីក្រុង​ Derna ងាយនឹងជន់លិចណាស់ ហើយអាងស្តុកទឹករបស់វា បានបណ្តាលឲ្យមានទឹកជំនន់ធ្ងន់ធ្ងរយ៉ាងតិច៥លើក គិតចាប់តាំងពីឆ្នាំ១៩៤២ ខណៈលើកចុងក្រោយបំផុតគឺនៅឆ្នាំ ២០១១។

ទំនប់​ទាំង​ពីរ ​ដែលបាក់​កាលពី​ថ្ងៃ​ចន្ទ​ទី១១ខែកញ្ញា គឺត្រូវ​បាន​សាងសង់កាលពី​ប្រហែល​កន្លះ​សតវត្ស​រ៍មុន ពោលគឺ​ចន្លោះ​ឆ្នាំ១៩៧៣ដល់១៩៧៧ ដោយ​ក្រុមហ៊ុន​សំណង់​យូហ្គោស្លាវី។

លោក Ahmed Madroud អភិបាលរងក្រុងបានប្រាប់ Al Jazeera ថា ទំនប់ទាំងពីរ មិនបានទទួលការថែទាំចាប់តាំងពីឆ្នាំ២០០២មកម្ល៉េះ។

៤. គ្មានការព្រមានជាមុន

លោក Petteri Taalas ប្រធានអង្គការឧតុនិយមពិភពលោក (WMO) នៅ UN បាននិយាយថា បើមានការព្រមានជាមុន ប្រហែលជាអាចបញ្ចៀសការស្លាប់និងរបួសមនុស្សភាគច្រើន។

លោក Taalas ប្រាប់អ្នក​យក​ព័ត៌មាន ​ក្នុង​សន្និសីទ​កាសែត​កាល​ពី​ថ្ងៃ​ព្រហស្បតិ៍ទី១៤ខែកញ្ញាថា ប្រសិនបើសេវាឧតុនិយមដំណើរការជាធម្មតា ពួកគេនឹងចេញការព្រមាន ហើយអាចជម្លៀសប្រជាជនបានទាន់ពេលវេលា។ មនុស្សភាគច្រើនអាចរួចផុតពីសេចក្តីស្លាប់។

លោក Talaas បន្ថែមថា បញ្ហាអស្ថិរភាពនយោបាយនៅក្នុងប្រទេស បានរារាំងកិច្ចខិតខំប្រឹងប្រែងរបស់ WMO ក្នុងការធ្វើការជាមួយរដ្ឋាភិបាលលីប៊ី ដើម្បីកែលម្អប្រព័ន្ធទាំងនេះ៕

ប្រែសម្រួល៖ Vann Vann

ប្រភព៖ CNN

ចុចអាន៖ UN អំពាវនាវសុំទឹកប្រាក់ជាបន្ទាន់ យកទៅជួយជនរងគ្រោះ ដោយទឹកជំនន់នៅ លីប៊ី