ថៃ ព្រមានឲ្យ១៤ខេត្តនៅភាគខាងត្បូង ប្រយ័ត្នជំនន់រហ័ស ខណៈមនុស្សស្លាប់ កើនដល់២៥នាក់

ប្រទេសថៃ បានចេញការព្រមានឲ្យខេត្តចំនួន១៤នៅភាគខាងត្បូង ត្រូវមានការប្រុងប្រយ័ត្នខ្ពស់ហើយត្រៀមខ្លួនទប់ទល់ជាមួយជំនន់រហ័ស រហូតដល់ចុងសប្តាហ៍ ខណៈតួលេខមនុស្សស្លាប់ដោយគ្រោះធម្មជាតិនៅទីនោះ កើនដល់២៥នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីមានមនុស្សស្លាប់ហើយនោះ ទឹកជំនន់ក៏បានជន់លិចសហគមន៍ចំនួន ៣ ៧២៩នៅ ៨៧ស្រុក ហើយប៉ះពាល់មនុស្សចំនួន ៦៦៤ ១៧៣គ្រួសារផងដែរ។

តាមការចុះផ្សាយរបស់ Bangkok Post នៅថ្ងៃអង្គារទី៣ខែធ្នូឆ្នាំ២០២៤, នាយកដ្ឋានបង្ការនិងកាត់បន្ថយគ្រោះមហន្តរាយ បានចេញសេចក្តីថ្លែងការណ៍ថា ប្រព័ន្ធវិសម្ពាធទាបនៅសមុទ្រចិនខាងត្បូង នឹងផ្លាស់ទីកាត់ឈូងសមុទ្រថៃនិងភាគខាងត្បូងប្រទេសថៃ ចូលទៅក្នុងសមុទ្រ Andaman ផ្នែកខាងក្រោម។ ដូច្នេះភ្លៀងនឹងនៅតែបន្តធ្លាក់ខ្លាំងទៀត ហើយស្ថានភាពគ្រោះទឹកជំនន់នឹងមិនធូរស្រាលឡើយ រហូតដល់ចុងសប្តាហ៍។ 

ទន្ទឹមនោះ នាយកដ្ឋានបានព្រមានឲ្យខេត្តចំនួន១៤នៅភាគខាងត្បូងត្រូវមានការប្រុងប្រយ័ត្នខ្ពស់ដែលខេត្តទាំងនោះមានដូចជា Chumphon, Surat Thani, Nakhon Si Thammarat, Phatthalung, Songkhla, Pattani, Yala, Narathiwat, Ranong, Phang Nga, Phuket, Krabi, Trang, និង Satun។

នៅក្នុងសេចក្តីថ្លែងការណ៍ដាច់ដោយឡែក អ្នកនាំពាក្យរងរដ្ឋាភិបាលថៃលោក Anukool Pruksanusak បានធានាដល់កសិករនៅតំបន់ភាគខាងត្បូងថា សូមកុំបារម្ភឲ្យសោះ រដ្ឋនឹងផ្តល់ជំនួយដល់ជនរងគ្រោះដោយទឹកជំនន់។

តាមការបញ្ជាក់របស់លោក, ទឹកជំនន់ដែលកំពុងបន្តនៅភាគខាងត្បូងប្រទេសថៃ បានប៉ះពាល់យ៉ាងធ្ងន់ធ្ងរដល់វិស័យកសិកម្ម ជាពិសេសការចិញ្ចឹមសត្វតែម្តង។ ដូច្នេះ រដ្ឋាភិបាលកំពុងធ្វើការយ៉ាងសស្រាក់សស្រាំជាមួយភ្នាក់ងារពាក់ព័ន្ធទាំងអស់ដើម្បីផ្តល់ជំនួយបន្ទាន់៕

អត្ថបទ៖ សុខ សុវណ្ណ

ចុចអាន៖ ថៃ​ព្រមាន​ពី​ភ្លៀង​ធ្លាក់​​ខ្លាំង​ថែម​​ទៀត ខណៈ​អ្នក​ស្លាប់​ព្រោះ​ទឹក​ជំនន់​កើន​ដល់ ២២​នាក់