ទឹកជំនន់នៅភាគខាងត្បូងថៃ រឹតតែធ្ងន់ ឯមនុស្សស្លាប់ កើនច្រើនឡើងៗ

ស្ថានភាពទឹកជំនន់នៅភាគខាងត្បូងប្រទេសថៃ មិនទាន់ធូរស្រាលឡើយ ដោយគិតត្រឹមល្ងាចថ្ងៃពុធទី៤ខែធ្នូឆ្នាំ២០២៤ តួលេខមនុស្សបាត់បង់ជីវិតដោយគ្រោះធម្មជាតិនេះ បានកើនឡើងដល់២៩នាក់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង បើតាមការចុះផ្សាយរបស់ CNA, មនុស្សជាង ៣០ ០០០នាក់ ក៏ត្រូវជម្លៀសចេញពីផ្ទះសម្បែងផងដែរ ខណៈ ១៥៥ ០០០គ្រួសារត្រូវរងផលប៉ះពាល់។

មុននេះ នាយកដ្ឋានបង្ការនិងកាត់បន្ថយគ្រោះមហន្តរាយ បានព្រមានឲ្យខេត្តចំនួន១៤ដូចជា ​Chumphon, Surat Thani, Nakhon Si Thammarat, Phatthalung, Songkhla, Pattani, Yala, Narathiwat, Ranong, Phang Nga, Phuket, Krabi, Trang, និង Satun ត្រូវមានការប្រុងប្រយ័ត្នខ្ពស់ចំពោះបំណាក់ដី ហើយត្រៀមខ្លួនទប់ទល់ជាមួយជំនន់រហ័ស រហូតដល់ចុងសប្តាហ៍។

ក្នុងសេចក្តីប្រកាសនោះ នាយកដ្ឋាននិយាយថា ប្រព័ន្ធវិសម្ពាធទាបនៅសមុទ្រចិនខាងត្បូង នឹងផ្លាស់ទីកាត់ឈូងសមុទ្រថៃនិងភាគខាងត្បូងប្រទេសថៃ ចូលទៅក្នុងសមុទ្រ Andaman ផ្នែកខាងក្រោម។ ដូច្នេះភ្លៀងនឹងនៅតែបន្តធ្លាក់ខ្លាំងទៀត ហើយស្ថានភាពគ្រោះទឹកជំនន់នឹងមិនធូរស្រាលឡើយ រហូតដល់ចុងសប្តាហ៍។ 

សូមបញ្ជាក់ថា នេះមិនមែនជារឿងថ្មីទេដែលប្រទេសថៃ ជួបគ្រោះទឹកជំនន់ធ្ងន់ធ្ងរបែបនេះ។ ជាក់ស្តែងកាលពីឆ្នាំ២០១១ ទឹកធំនៅទូទាំងប្រទេសបានបណ្តាលឲ្យមនុស្សជាង ៥០០នាក់បាត់បង់ជីវិត និងបំផ្លាញផ្ទះសម្បែងរាប់លានខ្នង៕

អត្ថបទ៖ សុខ សុវណ្ណ

ចុចអាន៖ ថៃ ព្រមានឲ្យ១៤ខេត្តនៅភាគខាងត្បូង ប្រយ័ត្នជំនន់រហ័ស ខណៈមនុស្សស្លាប់ កើនដល់២៥នាក់