អ៊ីស្រាអែល កំពុងរៀបផែនការទម្លាក់គ្រាប់បែកកម្ទេចតំបន់ហ្គាហ្សា អមដោយការវាយលុកតាមដីគោក

អ្នកសារព័ត៌មានផ្នែកស៊ើបអង្កេតអាមេរិកលោក Seymour Hersh បាននិយាយកាលពីថ្ងៃអាទិត្យថា អ៊ីស្រាអែលកំពុងរៀបចំផែនការវាយប្រហារតំបន់ហ្គាហ្សា ដោយប្រើគ្រាប់បែកទម្លាក់ពីលើអាកាស JDAM ដែលនឹងនាំទៅដល់ការកម្ទេចទីក្រុង Gazi ទាំងមូលនៅថ្ងៃអាទិត្យ ឬថ្ងៃចន្ទ ។

លោក Hersh បាននិយាយនៅក្នុងវេទិកា Substack ថា “អ្នករៀបចំផែនការសង្គ្រាមរបស់អ៊ីស្រាអែលកំពុងអាប់ដេតស៊េរីគ្រាប់បែក JDAM ឲ្យមានក្បាលគ្រាប់ធំជាងមុន ដើម្បីងាយបុកចូលជ្រៅទៅក្នុងដី មុនពេលវាផ្ទុះក្នុងជម្រៅពី ៣០ ទៅ ៥០ ម៉ែត្រ ហើយសម្លាប់មនុស្សទាំងអស់ក្នុងរយៈពេលមួយប៉ប្រិចភ្នែក” ។

អ្នកសារព័ត៌មានរូបនេះបានលើកឡើងថា “ផែនការបច្ចុប្បន្នបានអំពាវនាវឲ្យការវាយប្រហារដោយប្រើគ្រាប់បែក JDAM ហើយប្រសិនបើវាត្រូវបានអនុញ្ញាតមែននោះ ការវាយប្រហារនឹងកើតមានឡើងនៅថ្ងៃអាទិត្យ ឬថ្ងៃចន្ទនេះ ដោយអាស្រ័យលើពេលវេលានៃការជម្លៀសពលរដ្ឋចេញពីទីក្រុង Gazi បូករួមជាមួយនឹងស្ថានភាពវាយលុករបស់អ៊ីស្រាអែលតាមផ្លូវគោកនៅភាគខាងត្បូងផងដែរ” ។

ទន្ទឹមនោះ ផែនការនេះកើតមានឡើង បន្ទាប់ពីយោធាអ៊ីស្រាអែលបានសម្លាប់សមាជិកជាន់ខ្ពស់ ២ រូបរបស់ក្រុមសកម្មប្រយុទ្ធប៉ាឡេស្ទីនហាម៉ាស់ ក្រោយពេលអ្នកទាំងពីរបានចូលរួមយ៉ាងសកម្មក្នុងការវាយប្រហារដ៏គួរឲ្យភ្ញាក់ផ្អើលទៅលើប្រទេសអ៊ីស្រាអែលកាលពីសប្ដាហ៍មុន ។

យោធាអ៊ីស្រាអែលបានបញ្ជាក់ទៀតថា អ្នក​ទាំង​ពីរដែលត្រូវយោធាសម្លាប់ក្នុងការវាយប្រហារតាមផ្លូវអាកាស​គឺមាន​លោក Ali Qadi មេ​បញ្ជាការ​ក្រុម​ហាម៉ាស់ និង​លោក Murad Abu Murad សមាជិក​ជាន់​ខ្ពស់​នៃ​ក្រុម​ប្រដាប់​អាវុធ​ហាម៉ាស់ ។

គួរបញ្ជាក់ថា រហូតមកដល់ពេលនេះការវាយប្រហារគ្នាទៅវិញទៅមករវាងក្រុមប៉ាឡេស្ទីនហាម៉ាស់ និងអ៊ីស្រាអែលដែលផ្ទុះឡើងនៅព្រឹកព្រលឹមថ្ងៃសៅរ៍ ទី៧ ខែតុលា បានសម្លាប់មនុស្សជាង ៣,៦០០ នាក់ ក្នុងនោះមានពលរដ្ឋប៉ាឡេស្ទីន ២,២១៥ នាក់ ខណៈអ៊ីស្រាអែលមានចំនួន ១,៤០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ យោធា អ៊ីស្រាអែល វាយប្រហារតាមអាកាសសម្លាប់មេដឹកនាំក្រុមហាម៉ាស់ ២ រូប