យោធា អ៊ីស្រាអែល វាយប្រហារតាមអាកាសសម្លាប់មេដឹកនាំក្រុមហាម៉ាស់ ២ រូប

យោធាអ៊ីស្រាអែលបានសម្លាប់សមាជិកជាន់ខ្ពស់ ២ រូបរបស់ក្រុមសកម្មប្រយុទ្ធប៉ាឡេស្ទីនហាម៉ាស់ បន្ទាប់ពីអ្នកទាំងពីរបានចូលរួមយ៉ាងសកម្មក្នុងការវាយប្រហារដ៏គួរឲ្យភ្ញាក់ផ្អើលទៅលើប្រទេសអ៊ីស្រាអែលកាលពីព្រឹកព្រលឹមថ្ងៃទី៧ ខែតុលា ។

យោធាអ៊ីស្រាអែលបានបញ្ជាក់ទៀតថា អ្នក​ទាំង​ពីរដែលត្រូវយោធាសម្លាប់ក្នុងការវាយប្រហារតាមផ្លូវអាកាស​គឺមាន​លោក Ali Qadi មេ​បញ្ជាការ​ក្រុម​ហាម៉ាស់ និង​លោក Murad Abu Murad សមាជិក​ជាន់​ខ្ពស់​នៃ​ក្រុម​ប្រដាប់​អាវុធ​ហាម៉ាស់ ។

ពាក់ព័ន្ធនឹងការសម្លាប់លោក Ali Qadi និងលោក Abu Murad នេះដែរ អ្នកនាំពាក្យរបស់យោធាអ៊ីស្រាអែលក៏បានបង្ហោះវីដេអូនៅលើបណ្តាញសង្គមបង្ហាញពីការបំផ្លិចបំផ្លាញអគារមួយចំនួននៅក្នុងការវាយប្រហារតាមអាកាសនោះ ។

ស្របពេលជាមួយគ្នានេះ ប្រព័ន្ធផ្សព្វផ្សាយរបស់អ៊ីស្រាអែល The Times of Israel ក៏បានរាយការណ៍ផងដែរថា យោធាបានសម្លាប់លោក Ali Qadi នៅក្នុងការវាយប្រហារដោយយន្តហោះគ្មានមនុស្សបើកដោយសហការជាមួយអង្គការចារកម្មរបស់ប្រទេស ។

គួរបញ្ជាក់ថា រហូតមកដល់ពេលនេះការវាយប្រហារគ្នាទៅវិញទៅមករវាងក្រុមប៉ាឡេស្ទីនហាម៉ាស់ និងអ៊ីស្រាអែលដែលផ្ទុះឡើងនៅព្រឹកព្រលឹមថ្ងៃសៅរ៍ ទី៧ ខែតុលា បានសម្លាប់មនុស្សជាង ៣,៦០០ នាក់ ក្នុងនោះមានពលរដ្ឋប៉ាឡេស្ទីន ២,២១៥ នាក់ ខណៈអ៊ីស្រាអែលមានចំនួន ១,៤០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តើមូលហេតុអ្វីខ្លះទើប ក្រុមហាម៉ាស់ បើកការវាយប្រហារមិនធ្លាប់មានលើ អ៊ីស្រាអែល?