ព័ត៌មានអន្ដរជាតិ

សង្គ្រាមពាក្យសម្តីចិន-ហ្វីលីពីន លើហេតុការណ៍នៅសមុទ្រចិនខាងត្បូង កំពុងបង្កើនហានិភ័យជម្លោះប្រដាប់អាវុធ

បានផុស

១ year មុន

នៅ

ថ្ងៃអង្គារ ២៤ តុលា ២០២៣

ដោយ

អ្នកសង្កេតការណ៍ចិនមួយរូប បានព្រមានថា សង្គ្រាមពាក្យសម្តីកាន់តែខ្លាំងឡើងរវាងចិននិងហ្វីលីពីន ជុំវិញការប៉ះទង្គិចគ្នានៅក្នុងសមុទ្រចិនខាងត្បូង កំពុងបង្កើនហានិភ័យនៃជម្លោះប្រដាប់អាវុធ ដែលអាចអូសទាញសហរដ្ឋអាមេរិកឲ្យមកចូលរួមដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះកើតឡើង ខណៈភាគីទាំងពីរ បានចោទប្រកាន់ដាក់គ្នាជុំវិញឧប្បត្តិហេតុពីរលើកកាលពីថ្ងៃអាទិត្យទី២២ខែតុលា ទាក់ទងនឹងទូកឆ្មាំសមុទ្រទាំងសងខាង។

អ្នកនាំពាក្យក្រសួងការបរទេសចិន លោកស្រី Mao Ning កាលពីថ្ងៃចន្ទ បានចោទប្រកាន់ហ្វីលីពីនថាជាអ្នកបង្កហេតុ ដោយការឈ្លានពានម្តងហើយម្តងទៀតចូលទៅក្នុងដែនទឹក Renai Jiao និងបន្តផ្សព្វផ្សាយព័ត៌មានមិនពិត។

អ្នកនាំពាក្យក្រសួងការបរទេសចិន លោកស្រី Mao Ning (រូបថត៖ Global Times)

លោក Ding Duo សហការីស្រាវជ្រាវនៅវិទ្យាស្ថានជាតិ សម្រាប់ការសិក្សាសមុទ្រចិនខាងត្បូងបានព្រមានថា ឧប្បត្តិហេតុនេះ អាចតំណាងឲ្យចំណុចគ្រោះថ្នាក់សម្រាប់ទំនាក់ទំនងរវាងទីក្រុងប៉េកាំង និងសម្ព័ន្ធមិត្តចាស់បំផុតរបស់អាមេរិកនៅអាស៊ី។

មុននេះ រដ្ឋមន្ត្រីការពារជាតិហ្វីលីពីន បានចោទប្រកាន់ឆ្មាំសមុទ្រចិនថា យាយីនិងវាយប្រហារដោយចេតនាលើនាវាផ្គត់ផ្គង់របស់ខ្លួន និងនាវាឆ្មាំសមុទ្រហ្វីលីពីន។

ថ្វីបើប្រទេសចិន បានច្រានចោលរឿងនេះថាជា ការប៉ះទង្គិចគ្នាបន្តិចបន្តួចក៏ដោយ ប៉ុន្តែឆ្មាំសមុទ្រហ្វីលីពីន បាននិយាយកាលពីថ្ងៃចន្ទថា ការខូចខាតដល់កប៉ាល់ផ្គត់ផ្គង់ គឺមានលក្ខណៈធ្ងន់ធ្ងរគួរសម។

លើសពីនេះ ហ្វីលីពីន បានកោះហៅឯកអគ្គរដ្ឋទូតចិនដើម្បីធ្វើការតវ៉ាផ្នែកការទូត ខណៈស្ថានទូតក្រុងប៉េកាំងនៅទីក្រុងម៉ានីល ក៏បាននិយាយដែរថា ខ្លួនបានដាក់ពាក្យបណ្តឹងស្រដៀងគ្នានេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ក្រុងប៉េកាំង៖ សមុទ្រចិនខាងត្បូង មិនមែនជា “សង្វៀនប្រយុទ្ធ” សម្រាប់មហាអំណាចធំៗទេ