ក្រុមប្រឹក្សាសន្តិសុខ UN អនុម័តសេចក្តីសម្រេច អំពាវនាវឲ្យផ្អាកបាញ់ តែត្រូវ អ៊ីស្រាអែល ស្តីបន្ទោសមួយរំពេច

ឯកអគ្គរដ្ឋទូតអ៊ីស្រាអែលប្រចាំអង្គការសហប្រជាជាតិ លោក Gilad Erdan បានប្រកាសភ្លាមៗថា សេចក្តីសម្រេចដែលអនុម័តដោយក្រុមប្រឹក្សា UN នឹងគ្មានន័យអ្វីឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយ​ថា “អ៊ីស្រាអែល ​កំពុង​ប្រព្រឹត្ត​ទៅ​តាម​ច្បាប់​អន្តរជាតិ​នៅ​តំបន់ហ្គាហ្សា វាជារឿងអកុសលដែលក្រុមប្រឹក្សា នៅតែមិនអាចថ្កោលទោស ឬសូម្បីតែនិយាយអំពីការសម្លាប់រង្គាលដែលក្រុមហាម៉ាសបានធ្វើកាលពីថ្ងៃទី៧ខែតុលា និងនាំឲ្យមានសង្គ្រាមនៅហ្គាហ្សា”។

លោកបន្ថែមថា “នេះគឺជាភាពអាម៉ាស់មួយ! យុទ្ធសាស្រ្តរបស់ហាម៉ាសគឺ មានចេតនាធ្វើឲ្យស្ថានភាពមនុស្សធម៌កាន់តែយ៉ាប់យ៉ឺន នៅក្នុងតំបន់ហ្គាហ្សាស្ទ្រីប ហើយបង្កើនចំនួនអ្នកស្លាប់ និងរបួសខាងប៉ាឡេស្ទីន ដើម្បីឲ្យ UN និងក្រុមប្រឹក្សាសន្តិសុខព្យាយាមបញ្ឈប់អ៊ីស្រាអែល”។

ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតគាំទ្រសេចក្តីសម្រេចដាក់ចេញដោយប្រទេសម៉ាល់តា ដែលអំពាវនាវឲ្យពង្រីកការផ្អាកបាញ់ និងបើកច្រករបៀងមនុស្សធម៌ជាបន្ទាន់ នៅទូទាំងតំបន់ហ្គាហ្សាស្ទ្រីប។

សមាជិកចំនួន១២ប្រទេស បានបោះឆ្នោតគាំទ្រសេចក្តីសម្រេចនេះ ប៉ុន្តែមានការអនុបវាទ បីសំឡេង ពីសមាជិកអចិន្ត្រៃយ៍គឺសហរដ្ឋអាមេរិក ចក្រភពអង់គ្លេស និងរុស្ស៊ី។

សេចក្តីសម្រេចនេះ ក៏អំពាវនាវឲ្យមានការដោះលែងជាបន្ទាន់ និងដោយគ្មានលក្ខខណ្ឌនៃចំណាប់ខ្មាំងទាំងអស់ ដែលចលនាហាម៉ាស និងក្រុមដទៃទៀតកំពុងឃុំឃាំងផងដែរ។

ក៏មានការទាមទារឲ្យភាគីទាំងអស់ គោរពតាមកាតព្វកិច្ចរបស់ពួកគេក្រោមច្បាប់អន្តរជាតិផងដែរ ហើយមានការអំពាវនាវឲ្យអគ្គលេខាធិការ UN ត្រួតពិនិត្យ និងរាយការណ៍ឡើងវិញអំពីការអនុវត្តរបស់ខ្លួន៕

ប្រែសម្រួល៖ Vann Vann

ប្រភព៖ Aljazeera, BBC 

ចុចអាន៖ ប្រមុខ UN៖ តួលេខអ្នកស្លាប់នៅហ្គាហ្សា បង្ហាញថា ពិតជាមានអ្វីខុសហើយ ក្នុងប្រតិបត្តិការយោធារបស់អ៊ីស្រាអែល