អ្នកជំនាញថៃ ព្រមានផ្ទុះមេរោគហ្ស៊ីកា ក្នុងទីក្រុងបាងកក

អ្នកជំនាញផ្នែកមេរោគរបស់ប្រទេសថៃ​ បានចេញមុខព្រមានថា ទីក្រុងបាងកក កំពុងប្រឈមនឹងហានិភ័យផ្ទុះវីរុស ហ្ស៊ីកា ហើយអ្នកជំនាញបានក្រើនរំលឹកដល់ប្រជាជនឲ្យការពារខ្លួនពីមូសខាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Yong Poovorawan ប្រធានមជ្ឈមណ្ឌលឧត្តមភាពផ្នែករោគវិទ្យា នៅមហាវិទ្យាល័យវេជ្ជសាស្ត្រនៃសាកលវិទ្យាល័យ Chulalongkorn បានបង្ហោះលើទំព័រ Facebook របស់គាត់ថា ករណីឆ្លងវីរុស Zika ជាច្រើន ត្រូវបានរកឃើញក្នុងទីក្រុងបាងកក សូម្បីតែនៅតាមប្រាសាទ។

ទោះបីជាយ៉ាងណាក៏ដោយ លោកវេជ្ជបណ្ឌិតមិនបានផ្តល់តួលេខពិតនៃករណីឆ្លងក្នុងរាជធានីទេ ប៉ុន្តែសរសេរថា ការឆ្លង អាចបណ្តាលឲ្យស្លាប់មនុស្សមួយចំនួន។ វាក៏អាចបណ្តាលឲ្យកូនមានពិការភាពពីកំណើតផងដែរ ពោលគឺស្ត្រីមានផ្ទៃពោះដែលឆ្លងមេរោគហ្ស៊ីកា អាចផ្តល់កំណើតដល់កូន កើតមកមានពិការភាពខួរក្បាលឬក្បាលតូចជាងធម្មតា។ 

រោគ​សញ្ញា​នៃវីរុសហ្ស៊ីកា គឺ​ស្រដៀង​នឹង​ជំងឺ​គ្រុនឈាមដែរ ប៉ុន្តែស្ថានភាពអ្នកជំងឺអាចស្រាលជាងបន្តិច ហើយមេរោគនេះ ក៏ចម្លងដោយសត្វមូសខ្លា ស្រដៀងទៅនឹងគ្រុនឈាមដូចគ្នា។

ពិភពលោកបានដាក់ការចាប់អារម្មណ៍ខ្លាំងលើជំងឺហ្ស៊ីកា ជាលើកដំបូងក្នុងឆ្នាំ២០១៥ ដោយសារតែសមត្ថភាពរបស់វា អាចបង្កឲ្យមានពិការភាពពីកំណើតធ្ងន់ធ្ងរចំពោះទារក ដែលកើតចេញពីម្តាយឆ្លងរោគ។ បន្ថែមពីលើការចម្លងពីស្ត្រីមានផ្ទៃពោះទៅទារកក្នុងផ្ទៃ មេរោគ ហ្ស៊ីកា ក៏អាចឆ្លងតាមរយៈទំនាក់ទំនងផ្លូវភេទ ការបញ្ចូលឈាម និងការប្តូរសរីរាង្គ ផងដែរ។

ជាធម្មតា អ្នកជំងឺចេញរោគសញ្ញាក្នុងរយៈពេល ៣ទៅ៧ថ្ងៃក្រោយពេលឆ្លង ហើយអាការរួមមានគ្រុនក្តៅ កន្ទួល ឈឺសន្លាក់ ភ្នែកក្រហម ឈឺក្បាល ឈឺសាច់ដុំ និងអស់កម្លាំង៕

ប្រែសម្រួល៖ Vann Vann

ប្រភព៖ Nation

ចុចអាន៖ អ្នកមានផ្ទៃពោះប្រយ័ត្ន «វីរុសហ្សុីកា» ​អាចឱ្យកូនកើត​មក​ក្បាល​តូច​ ខូចប្រព័ន្ធប្រសាទ ឬស្លាប់ក្នុងផ្ទៃ